बागलुङ, पुस १० । बागलुङका एक वडा अध्यक्षको दैनिकी पञ्जीकरणका कागजपत्र भरेर सही गराउँन कुद्नैमा दिन वित्ने गरेको छ । बागलुङको जैमिनी नगरपालिका वडा नं. २ का वडा अध्यक्ष लक्ष्मीप्रसाद सापकोटाको दैनिकी वडामा दर्ता हुने पञ्जीकरण फाराम भरेर पञ्जीकाधिकारीको हस्ताक्षरका लागि घण्टौ कुद्दै वित्ने गरेको हो । 
नगरपालिकाको केन्द्रदेखि नजिकै रहेको उक्त वडामा वडा लामो समयदेखि कर्मचारीहरु नहुँदा वडामा भएका सबै काम भ्याउँन वडा अध्यक्षलाई हम्मेहम्मे छ । स्थानीय तहको निर्वाचनपछि वडा तहमै सबै काम र अधिकार हस्तान्तरण भएपनि कर्मचारी हस्तान्तरण नहुँदा सबै काम वडा अध्यक्षले नै गर्नुे अवस्था आएको वडा अध्यक्ष लक्ष्मीप्रसाद सापकोटाले बताउनुभयो ।
अध्यक्षले हस्ताक्षर गरेर हुने कागजातका लागि खासै समस्या नभएपनि पञ्जीकाधिकारीले हस्ताक्षर गर्नुपर्ने कागजातहरुका लागि आफू दैनिक दौडधुप गर्नुपरेको सापकोटाको भनाई छ । नगरका अन्य वडामा सचिव, सहयोगी भएपनि आफ्नो वडामा कोहीपनि नहुँदा एक्लैले काम भ्याउनु परेको उहाँको भनाई छ । ‘नगरपालिकामा कार्यपालिका लगायत अन्य विषयका बैठक हुन्छन्, बैठकमा जानु पर्दा वडा कार्यालयनै बन्द गर्नुपर्ने अवस्था छ ।’ सापकोटाले भन्नुभयो ।
केही समय स्थानीय जनप्रतिनिधिको रुपमा वडा सदस्यहरुले साथ दिएपनि अहिले एक सदस्य व्यवसाय तथा एक सदस्य जिल्ला बाहिर भएकाले आफूले एक्लै काम गर्नुपरेको सापकोटाको गुनासो छ । ‘म वडामा केही गर्छु भनेर वडा अध्यक्ष भएको थिए, तर अहिले वडा कार्यालयमा आउने सेवाग्राहीको कामका लागि लेख्दा लेख्दै हाँत गल्छन्, फेरी पञ्जीकरणका लागि अन्यत्रै वडामा खटिएका वडा सचिवलाई खोज्न दौडदा दौडदा खुट्टा गल्छन् ।’ सापकोटाले भन्नुभयो ।
वडामा केही नभए जनताले गाली गर्ने भएकाले योजना निर्माण, सम्झौता, कार्यान्वयनको अवस्था, अनुगमन, दैनिक प्रशासनिक काम लगायत धेरै गर्नुपर्दा समस्या भएकाले आफू राजिनामा दिने मनस्थितिमा पुगेको सापकोटाको भनाई छ । ‘जनप्रतिनिधिको काम र कर्मचारीको काम सबै आफै गर्नुपर्छ, एकजना कृषि प्राविधिक वडामा भएपनि कृषिका काममा बढी व्यस्त हुनुपर्छ, एक्लै कति काम भ्याउँनु बरु राजिनामा दिएर आनन्दको जीवन विताउँकी भन्ने सोंच समेत बनाएको छु ।’ सापकोटाले भन्नुभयो ।
जैमिनी नगरपालिकाका प्रमुख प्रशासकीय अधिकृत इश्वरीप्रसाद शर्माले कार्यालयमा कर्मचारीको अभाव भएका कारण वडामा कर्मचारी पठाउँन नसकिएको बताउनुभयो । ‘हाम्रो नगरपालिकाको मुख्य काममापनि कर्मचारी अभाव छ, हामीले सामान्य प्रशासन मन्त्रालयमा माग गरिरहेका छौं, कार्यालय खारेजीपछि खाली रहेका कर्मचारीहरु व्यवस्थापनमा प्रमुख जिल्ला अधिकारीले केही गर्न सक्नुहुन्छ की भनेर छलफल गरेका छौं, दरबन्दी प्राप्त भएपछि वडामा पठाउँने सोंचमा छौं ।’ शर्माले भन्ुनुभयो । नगर कार्यपालिकाको बैठकले कार्यालय सहयोगी नियुक्ति गर्ने निर्णय गरेपछि नियुक्ती गर्ने प्रक्रिया अगाडि बढेकाले कार्यालय सहयोगी भए वडामा केही सहज हुने नगरपालिकाले जनाएको छ ।
