बागलुङ, माघ २२ गते । आवश्यक विरुवा नपाउँदा गाउँपालिकालाई फलफुलको पकेट क्षेत्र बनाउँने बडिगाड गाउँपालिकाको योजना प्रभावित बनेको छ । बागलुङको बडिगाड गाउँपालिकाले कृषि क्षेत्रको विकासका लागि तय गरेको योजना विरुवा अभावले प्रभावित बनेको हो । गाउँपालिकाले चालु आर्थिक वर्षमा छ हजार हिउँदे फुलफुलका विरुवा वितरण गर्ने योजना बनाएपनि विरुवा नपाउँद योजना प्रभावित बनेको गाउँपालिकाका अध्यक्ष मेहरसिँह पाइजाले जानकारी दिनुभयो ।
कृषि अगुवाको रुपमा परिचित अध्यक्ष पाइजाले गाउँपालिकाको माथिल्लो भेगमा राम्रो प्रतिफल प्राप्त गर्न सकिने किवी तथा ओखरका विरुवा लगाउँने योजना अनुसार विरुवा खोजी भएपनि पाउँन नसक्दा योजना प्रभावित बनेको बताउनुभयो । गाउँपालिकाले चालु आर्थिक वर्षको नीति तथा कार्यक्रममा हिउँदे फलफुल खेती कार्यक्रम सञ्चालन गर्ने भनिएपनि देशका विभिन्न ठाउँमा विरुवा खरिदका लागि पुगेपनि नपाउँदा निरास हुनुपरेको अध्यक्ष पाइजाले बताउनुभयो ।
बडिगाड गाउँपालिकाको माथिल्लो भेगमा किवी तथा ओखरको राम्रो उत्पादन हुने भएकाले नेपालका विभिन्न ठाउँमा विरुवा खरिदका लागि आफै पुगेपनि विरुवा नपाउँदा कार्यक्रमनै प्रभावित हुने अवस्था सिर्जना भएको अध्यक्ष पाइजाले बताउनुभयो । गाउँपालिकाले चालु आर्थिक वर्षमा हिउँदे फलफुल खेती प्रवद्र्धन कार्यक्रमका लागि एक करोड रुपियाँ बजेट विनियोजन गरेको थियो ।
बाहिरी बजारमा किवी र ओखरको विरुवा खरिद गर्दा महंगो पर्ने भएकाले सितोष्ण बागवानी केन्द्र दोखलामार्फत सहुलियतमा विरुवा खरिद गर्ने योजना सहित केन्द्रलाई यस अगाडिनै पत्राचार गरिएपनि विरुवा लिने समयमा विरुवा नपाएपछि समस्या भएको गाउँपालिकाले जनाएको छ । गाउँपालिकाले हरेक घरमा किवी तथा ओखरको खेती गर्ने योजना अनुसार हरेक घरलाई ५÷५ किवी तथा ओखरको विरुवा वितरण गर्ने योजना बनाएको थियो ।
खुल्ला बजारमा प्रतिगोटा पाँच सयदेखि आठ सय रुपियाँसम्म पर्ने किवीको विरुवा केन्द्रमार्फत खरिद गर्दा प्रतिगोटा एक सय रुपियाँ मात्र पर्ने भएकाले सोही अनुसार खरिदको तयारी गरिएकोमा अहिले विरुवा नपाउँदा योजना कार्यान्वयनमा समस्या भएको बडिगाड गाउँपालिकाका प्रशासकीय अधिकृत प्रदीपचन्द्र सुवेदीले बताउनुभयो । सात÷सात हजार किवी र ओखरका बिरुवा माग गरेको गाउँपालिकाले दुइ सय ७२ वटा किवी र पाँच सय वटा मात्रै ओखरका बिरुवा पाएको छ । गाउँपालिकाले बागवानी केन्द्रलाई विरुवा उत्पादन गर्नुपुर्वनै आधिकारिक पत्राचार गरेका थियो । पछि विरुवा लिन दोखला पुग्नुभएका गाउँपालिका अध्यक्ष पाइजाले किवी र ओखरका बिरुवा नपाएपछि केही हलुवाबेद र अंगुरका बिरुवा लिएर फर्कनुभएको थियो ।
