बेलिना थापा
लमजुङ, भदौ २७ गते । हिमाली जिल्ला मनाङ र लमजुङको सिमाना हो म्यार्दीखोला । सोही खोलाको बाटो भएर दुई जिल्ला आउजाउ हुन्छ । म्यार्दीखोलामा निर्माण गरिएको बेलिब्रिज बाढीले बगाएपछि पुनः अर्को बेलिब्रिज हालिएको छ । गत असार ८ गते अबिरल वर्षासँगै आएको बाढीले खोलामा बनाइएको बेलिब्रिज बगाएको थियो । 
तत्काल आउजाउका लागि समस्या भएपछि काठको फड्के बनाएर आउजाउ गरिएको थियो । सवारी साधन भने वारीको वारी र पारीको पारी नै हुन थाले । मनाङबाट आउनेले फड्केको बाटो हिँडेर सवारी साधन फेर्ने र लमजुङबाट मनाङ जानेले फड्के तरेरै अर्को सवारी फेर्दै आएका छन् ।
ड्केको बाटो आवातजावत गर्न समस्या भएपछि खोलामा नयाँ बेलिब्रिज हालिएको छ । बेलिब्रिज फिनिसिङको काम भइरहेको छ । तर, मनाङतर्फ म्यार्दी खोला छेउमा ठूलो पहिरो आएर बाटो अवरुद्ध भएको छ । मानिस हिँडुन समेत मुस्किल भएको नासों गाउँपालिका १ का अध्यक्ष झलक गुरुङले बताउनुभयो ।
उहाँका अनुसार ठूला–ठूला ढुंगा रहेकाले पन्छाउन गाह्रो भएको छ । बेलिब्रिजको काम सम्पन्न हुन लाग्दापनि पहिरोले गर्दा आउजाउमा समस्या भएको उहाँले बताउनुभयो । ‘बेलिब्रिजको काम सकिन लागेको छ । केही दिनमै सकिएला । मनाङ जाने बाटोमा ठूलो पहिरो छ’ उहाँले भन्नुभयो, ‘पहिरो पन्छाउन सकिएन भने बेलिब्रिज बनेपनि सवारी सञ्चालन हुन सक्दैन । तत्काल पहिरो पन्छाउन मुस्किल छ ।’ म्यार्दीखोलामा निर्माण गरिएको बेलिब्रिजबाट मानिस आवातजावत गर्न थालेको उहाँले बताउनुभयो ।
गाउँपालिका अध्यक्ष चन्द्र घलेकाअनुसार म्यार्दीखोलामा बेलिब्रिज हालिसकेको र दाँया बाँया ढलान गर्न बाँकी रहेको छ । मनाङतर्फको भागमा पहिरो गएकाले सिमेन्ट, गिटी ल्याएर ढलान गर्न नसकिएको कुरा प्राविधिकले बताएको उहाँले बताउनुभयो ।
पहिरो खुलाउन नेपाली सेनाले बम बिस्फोट गरेको र अझै गनुपर्ने देखिएको उहाँले बताउनुभयो । भन्नुभयो– ‘बेलिब्रिजको काम त सकिन लाग्यो । मनाङतर्फको पहिरोले बाटो बन्द छ । त्यही बाटो हिँडेर मनाङ जानेले गाडी फेर्नुपर्छ । पहिरो खुलेपछि मात्र बेलिब्रिजको सबै काम सकिएला ।’ पहिरो खुलाउन २ वटा मेशिनले काम गरिरहेको र करिव एक हप्तामा बेलिब्रिजको बाटो भएर सवारी साधन गुड्ने उहाँले बताउनुभयो ।
प्रमुख जिल्ला अधिकारी पुष्पराज पौडेलले डिभिजन सडक कार्यालयलाई छिट्टै बेलिब्रिजको काम सक्न निर्देशन दिएको बताउनुभयो । उहाँले भन्नुभयो–‘पुलमा फलाम जोड्ने काम सकिएको छ । दुवैपट्टी ढलान गर्न बाँकी छ । त्यो काम छिट्टै गर्नुस् भनेर भनेका छौं । अबको केही दिनमा पुलको बाटो भएर सवारी गुड्ने कुरा गर्नुभएको छ ।’
डिभिजन सडक कार्यालय दमौलीका सव इन्जिनियर सुमन अधिकारीकाअनुसार म्यार्दीखोलामा बेलिब्रिज हालि सकिएको छ । अब दायाँ र बायाँ एप्रोज स्ल्याब हाल्न बाँकी छ । एक हप्तामा सबै काम सकिने र गाडी गुड्ने गरी काम गरेको उहाँले बताउनुभयो । म्यार्दीभीरको पहिरोले पुलको फिनिसिङमा अवरोध गरेको र पहिरो खुलेपछि आवश्यक सामान ल्याएर काम गरिने उहाँले बताउनुभयो ।
उहाँले भन्नुभयो–‘ढलान गर्ने सामान तालडाँडामा छ । पहिरोले जान सकेको छैन । पहिरो खुलेपछि सामान ल्याएर काम गर्छौं । सबै काम सक्न एकसाता लाग्न सक्छ ।’ उहाँकाअनुसार अहिले निर्माण गरिएको पुलको लम्बाई २४ मिटर लम्बाइ र चार मिटर (सिंगल लेन) छ ।
यसअघि सडक डिभिजन कार्यालय दमौलीमार्फत ग्याल्बा–क्याराभान जेभी कन्ट्रक्सनले एक करोड ७५ लाख रुपियाँमा म्यार्दीखोलामा पूल निर्माण गरेको थियो । उक्त बेलिब्रिज असार ८ गते दिउँसोको भीषण बाढीले बगाएको थियो । म्यार्दीखोला लमजुङको बेंसीसहरबाट ३५ र मनाङको चामेबाट ३० किलोमीटरको दुरीमा पर्छ । २०६४ मा नेपाली सेनाले सडक निर्माण गर्दा बनाएको काठेपूल २०७२ जेठमा भाँचिएको थियो ।
त्यसपछि डिभिजन सडक कार्यालय दमौलीले ‘स्टील गार्डर ब्रिज’ राखेकोमा उक्त पूल एक महिनापछि असार ३१ गते म्यार्दीखोलामा आएको भीषण बाढीले बगाएको थियो । पुनः काठेपूल निर्माण गरी सवारी आवतजावत गराइएको थियो । त्यसपछि गत साउनमा बेलिब्रिज बनाइएको थियो । लमजुङ–मनाङ आवतजावत गर्न बेंसीसहर–चामे सडक २०६९ सालबाट सुचारु भएको हो । चामे पुग्नमात्रै बेंसीशहरबाट करिब सात घण्टा लाग्छ ।
गाेरखापत्र दैनिकमा प्रकाशित
