कास्की, असाेज १ गते । गण्डकी प्रदेशको भ्रमणमा आएको सुदुरपश्चिम प्रदेशका सभासदहरुको टोलीले मंगलबार मुख्यमन्त्री पृथ्वीसुब्बा गुरुङसँग भेटेको छ । अर्थ, विकास तथा प्राकृतिक स्रोत साधान समिति सभापति हर्कबहादुर कुंवरको नेतृत्वको टिमले मुख्यमन्त्रीसंग सामुहिक भेट गर्दै अनुभव आदान प्रदान गरेको हो ।
संघीयताको सफल कार्यन्वयन, प्रदेश सभाले बनाउने कानुन, संघ र स्थानीय तहसँगको समन्वय गर्ने विषयमा अनुभव साटासाट भएको सदुरपश्चिम प्रदेश सांसद हर्कबहादुर कुँवरले जानकारी दिनुभयो ।
भेटमा मुख्यमन्त्री गुरुङले चालु आर्थिक वर्षमा प्रदेश सरकारहरुले गति लिन सक्नुपर्ने बताएका थिए । कर्मचारी समायोजन केही मात्रामा भएको, कानुन निर्माण र कार्यविधि बनेको र सरकारलेपनि केही अनुभव बटुलेको भन्दै अब काम गर्न अनकुल रहेको समेत बताउनुभयो ।
सुदुरपश्चिम प्रदेशका सांसदहरु प्रदेशका मध्यकालिन र दीर्घकालिन लक्ष्य निर्माणका लागि गण्डकी प्रदेशको अनुभवबारे जिज्ञाशा राखेका थिए । जवाफमा मुख्यमन्त्री गुरुङले प्रदेश नीति तथा योजना आयोग बनाएर जान सुझाएका थिए ।
गण्डकी प्रदेशले हेलो मुख्यमन्त्री, एक्सन रुम जस्ता जनतासँग प्रत्यक्ष सरोकार राख्ने कार्यक्रम सुरुवात गरेको जानकारी गराउँदै मुख्यमन्त्री गुरुङले यसलाई सुदुरपश्चिम प्रदेशलेपनि सुरुवात गर्दा जनताको गुनासो सुन्न सहज हुने बताउनुभएको थियो ।
मुख्यमन्त्री गुरुङले स्थानीय निकाय स्वतन्त्र नभई स्वायत्त निकाय भएकोले प्रदेशको योजनामा साथ दिन आवश्यक रहेको बताउनुभयो । प्रदेश सांसदहरुले सांसद क्षेत्र विकास कोषलाई परिचालन गर्ने विषयमा समेत छलफल भएको थियो ।
