पोखरा, बैशाख २५ गते । कोरोना भाइरस कोभिड १९ को संक्रमण फैलिन नदिन गरिएको लकडाउँनका बेला परेको विश्व शान्तिका अग्रदूत गौतम बुद्धको २५६४ औं जन्मजयन्ती तथा कोरोना भाइरसका विरुद्धको लडाइमा सक्रिय स्वास्थ्यकर्मी, सुरक्षाकर्मीको उच्च सम्मानमा गण्डकी प्रदेशका सबै जिल्लामा दीप प्रज्ज्वलन गरिएको छ ।
प्रधानमन्त्री केपी शर्मा ओलीले गौतम बुद्धको जन्म जयन्तीका अवसर तथा विश्वव्यापी माहामारीको रुपमा फैलिइरहेको कोरोना भाइरस कोभिड १९ का विरुद्धमा लडिरहेका चिकित्सक, स्वास्थ्यकर्मी, स्वयंसेवकको उच्च सम्मान, संक्रमितहरुको शीघ्र स्वास्थ्यलाभको कामना र मृत्युवरण गरेकाहरुको शान्तिका लागि दीपप्रज्ज्वलनको आव्हान गर्नुभएको थियो ।
बैशाख शुक्ल पूर्णिमालाई शान्तिका अग्रदूत गौतम बुद्धको सम्मान तथा स्मृतिमा विश्व शान्तिका लागि पुराउँनु भएको योगदानको कदर गर्दै बुद्ध जयन्ती मनाउँन थालिएको थियो । विगतका वर्षमा गण्डकी प्रदेशका विभिन्न ठाउँमा भव्यताका साथ बुद्ध जयन्ती मनाइने तथा विभिन्न चैत्य, गुम्बा, विहारमा भव्य पुजाआजा गरिने गरेको भएपनि यसवर्ष लकडाउँनका कारण धार्मिक स्थल, बजार, चोक तथा घरघरमा दीपावली गरेर बुद्ध जयन्ती मनाइएको थियो ।
बुद्धजयन्तीका अवसरमा दीप प्रज्ज्वलन गर्दै गण्डकी प्रदेशका मुख्यमन्त्री पृथ्वीसुब्बा गुरुङले बुद्धले विश्व शान्तिका लागि पु¥याएको योगदान अतुलनी भएको बताउनुभयो । अहिले मानव जगत आफ्नो अस्तित्वका लागि कोरोना भाइरस विरुद्ध लडिरहेको र त्यो लडाइमा प्रत्यक्ष सहभागी स्वास्थ्यकर्मी, सुरक्षाकर्मी, स्वयंसेवकको योगदानको उच्च सम्मान गरेर बजारमा दीप प्रज्ज्वलन गरिएको म्याग्दीका सामाजिक अगुवा चन्द्रकुमार केसीले बताउनुभयो ।
‘गौतम बुद्धले विश्वमा शान्तिको सन्देश छर्नु भयो, यही समयमा विश्वमा त्रास फैलाएको कोरोना भाइरसका विरुद्धमा लडेर अर्को शान्तिको सन्देश दिन खटिरहेकाहरुलाई हामीले विर्सन सक्दैनौं, त्यसैले दीप प्रज्ज्वलन गरेर मानिसको अस्तित्वका लागि लडेका हतियार विहिन स्वास्थ्यकर्मीहरुलाई सम्झिरहेका छौं ।’ पोखराका विनय खड्काले भन्नुभयो ।
