दाङ। राजपुर गाउँपालिका–७ बनकट्टीबासीलाई राहत वितरणका लागि लगिएको चामल गुणस्तरहीन भएको भन्दै फिर्ता गरिएको छ । लमहीको आरके सप्लायर्सले बिक्री गरेको चन्दन लेखिएको चामल गुणस्तरहीन भेटिएको हो ।
सप्लायर्सबाट राजपुर–७ स्थित भयरथान सामुदायिक वन कार्यालयले उपभोक्तालाई राहत वितरणका लागि १६४ बोरा चामल लगेकामा १३२ बोरा चामल कुहिएको परेको सामुदायिक वनका अध्यक्ष चेतबहादुर वलीले जानकारी दिनुभयो । वन समूहले रु एक हजार एक सय २५ प्रतिबोरा मूल्यमा चामल किनेको थियो ।
राहतका लागि किनिएको चामल कुहिएको भेटिएपछि सप्लायर्सको गोदाम बन्द गरिएको छ । आनन्द गुप्ता र इन्द्रमणि खनालले संयुक्त रुपमा सञ्चालन गरेको उक्त सप्लायर्स बन्द गरिएको वडा प्रहरी कार्यालय लमहीका प्रमुख प्रज्वल थपलियाले जानकारी दिनुभयो । देउखुरी उद्योग वाणिज्य संघका अध्यक्ष रत्नप्रसाद श्रेष्ठले पनि गोदाम बन्द गरेर थप अनुसन्धान शुरु गरिएको बताउनुभयो । सप्लायर्सका सञ्चालक गुप्ता र खनालले आफूहरुले चामल नहेरेका कारण समस्या भएको प्रतिक्रिया दिनुभयो ।
