कास्की । गण्डकी प्रदेशका मुख्यमन्त्री पृथ्वीसुब्बा गुरुङसहित ७ जना मन्त्रीको कोरोना परीक्षणको पीसीआर रिपोर्ट ‘नेगेटिभ’ आएको छ । गण्डकी प्रदेशसभाको बैठकको पुर्वसन्ध्यामा सम्भावित कोरोना संक्रमणको अवस्था जान्नका लागि मंलवार सरकारका मुख्यमन्त्री, मन्त्री, सचिव, कर्मचारीलगायत १४६ जनाको स्वाब संकलन गरेको थियो ।
परीक्षणबाट सबैको नतिजा नेगेटिभ आएको प्रदेश स्वास्थ्य निर्देशनालयले जानकारी दिएको छ । त्यसैगरी बुधवार सभामुख नेत्रनाथ अधिकारी, उप–सभामुख सिर्जना शर्मा, प्रदेशसभा सदस्य, प्रदेशसभा सचिवालयका कर्मचारी तथा प्रदेशसभा सदस्यका स्वकीय सचिवसहित ११२ र शुक्रवार थप ४७ जनाको पीसीआर जाँचका लागि स्वाब संकलन गरिएको थियो । उनीहरूको नतिजा आइसकेको छैन ।
प्रदेशमा हालसम्म १ हजार ५२० जनाको पीसीआर विधिबाट परीक्षण गरिएको छ । तत्कालै परीक्षणको दायरा बढाएर ३ देखि ४ हजारसम्म पुर्याउने योजना बनाएको स्वास्थ्य निर्देशनालयलका निर्देशक डा विनोदविन्दु शर्माले जानकारी दिए । गण्डकी प्रदेशमा अहिलेसम्म ५ जनामा कोरोना संक्रमण देखिएको छ ।
