ताप्लेजुङ ।नेकपा एमालेको भ्रातृ सङ्गठन अनेरास्ववियुका ताप्लेजुङ सह–संयोजक एवं कोसी प्रदेशका सांसद तिलकुमार मेन्याङ्बोका स्वकीय सचिव विवेक बानियाँमाथि खुकुरी प्रहार भएको छ ।
सदरमुकाम फुङलिङको आफ्नै निवास अगाडि सोमबार बिहान खुकुरी प्रहार भएको प्रहरीले जनाएको छ । खुट्टामा गम्भीर चोट लागेका उनको जिल्ला अस्पताल ताप्लेजुङमा उपचार भइरहेको छ ।
जिल्ला प्रहरी कार्यालयका सूचना अधिकारी कमल लुङ्गीलेका अनुसार फुङलिङ नगरपालिका–४ का प्रेमराज लिम्बूले खुकुरी हानेका हुन । ‘उहाँहरूको पुरानै लेनदेनको विषय लेनदेनको केस रहेछ, माननीयज्यूहरूसँग पनि बसेर कुरा भएको रहेछ,’ लुङगेलीले भने, ‘मान्छे खोजी गरिरहेका छौँ, भागिसकेको छ ।’ चारैतिर खोजी भइरहेकाले प्रहरीले पक्राउ गर्ने उनले बताए ।
एमालेका कार्यवाहक अध्यक्ष सन्तोष खतिवडासहितका नेता कार्यकर्ता जिल्ला अस्पतालमा भेला भएका छन् । विवेक र प्रेमको चेक बाउन्सको विषय रहेको एमालेका एक नेताले बताए । विवेकलाई आक्रमण गरेपछि प्रेमले पार्टीका कार्यवाहक अध्यक्ष खतिवडालाई पनि आक्रमण प्रयास गरेको ती नेताले बताएका छन् । यो कान्तिपुर अनलाइन पत्रकीमा प्रकाशित छ ।
