बागलुङ । बागलुङको ढोरपाटन नगरपालिका वडा न. ५ मस्तिमा बुधबार साँझ पीकअप जीप दुर्घटना हुँदा १६ जना घाइते भएका छन् ।
बुधबार साँझ करिब ५ बजेको समयमा बुर्तिबाङदेखि यात्रु लिएर छुटेको ग २ च २३१४ नम्बरको पीकअप जीप दुर्घटना हुँदा जीपमा सवार चालक सहित १६ जना यात्रु घाइते भएको इलाका प्रहरी कार्यालय बुर्तिबाङका प्रमुख प्रहरी निरीक्षक राजकुमार बिकले बताए ।
घाइते हुनेहरुमा १२ महिला, २ जना पुरुष र दुई जना बच्चा रहेको बताइएको छ । घाइतेहरूको हात खुट्टा र शरीरका विभिन्न भागमा चोट लागेको बताइएको छ । ढोरपाटन ५ को चौर पाखापानी तर्फ जाँदै गरेको जीप चालकले ब्याक गर्ने क्रममा अनियन्त्रित भई सडकदेखि करिब १५ मिटर तल खसेको हो ।
वर्षात भइरहेको र सडक चिप्लो र धेरै यात्रु रहेका कारण दुर्घटना भएको हुन सक्ने यात्रुले बताएका छन । केही घाइतेहरुलाई धौलागिरी अस्पताल बागलुङमा ल्याउने तयारी भइरहेको बताइएको छ ।
तस्विर ःटाेरपाटन
