बागलुङ ,३ जेठ । जिल्ला प्रहरी कार्यालय बागलुङले नीजि व्यवसाय तथा सरकारी सम्पति तोडफोड गरेको आरोपमा एक जनालाई पक्राउ गरेको छ ।
गत जेठ १ गते आफ्नै घरमा मृत भेटिएकी १७ वर्षिया बालिका ( बागलुङ ६ ) को न्यायका लागि भन्दै गरिएको प्रदर्शनका क्रममा नीजि व्यवसाय तथा सरकारी सम्पति तोडफोड गरेको आरोपमा बागलुङ नगरपालिका वडा नं १० का कृष्ण बहादुर भण्डारीलाई नियन्त्रणमा लिएको जिल्ला प्रहरी कार्यालय बागलुङका प्रहरी निरिक्षक प्रताप पौडेलले जानकरी दिए ।
प्रदर्शनका क्रममा दुई घण्टाका लागि आव्हान गरिएको बागलुङ बजार बन्दको कार्यक्रमलाई अबज्ञा गरेको भन्दै बजारका केही पसलमा तोडफोड भएको थियो । व्यवसायीको उजुरीका आधारमा प्रदर्शन तथा तोडफोडको नेतृत्व गरेको भन्दै प्रहरीले भण्डारीलाई नियन्त्रणमा लिएको हो ।
उनीसहित तीन जनाबिरुद्ध प्रहरीमा उजुरी परेको प्रहरी निरीक्षक पौडेलले बताए । भण्डारीलाई जिल्ला अदालतबाट दश दिनको म्याद थप गरी अनुसन्धान भैरहेको उनले जानकारी दिए । बन्द आव्हानका बेला पसल सञ्चालन गरेको भन्दै बागलुङ बजारको हमाल भाँडा लगायतका पसलमा तोडफोड भएको थियो ।
बागलुङ ६ को हत्या गरिएको भन्दै उनको माईती पक्ष र सरोकारवालाले न्यायका लागि निरन्तर प्रदर्शन गरेका थिए ।
