बागलुङ २ कात्तिक । धौलागिरी अस्पतालले सहकर्मीलाई ज्यानमार्ने धम्की दिने डा. नन्दन प्रसाद शाहलाई बर्खास्त गरेको छ । अस्पताल व्यवस्थापन समिति, प्रशासन र पीडित पक्षहरु बीच शुक्रबार गरिएको छलफल पश्चात उनलाई बर्खास्त गरिएको मेसु (मेडिकल सुपरिटेण्डेन्ट) रविरंजन प्रधानले बताए ।
‘उनले राजीनामापनि दिएका थिए, शुक्रबारको बैठकले उनलाई बर्खास्त गर्ने निर्णय गरेको छ ।’ उनले भने–‘अस्पताल जस्तो संवेदनशिल क्षेत्रमा एक सहकर्मीले अर्को सहकर्मीलाई धम्की दिनु गलत थियो ।’
डा. शाहले सोही अस्पतालमा कार्यरत आशिष सापकोटालाई गत २७ गते ज्यान मार्ने धम्की दिएका थिए ।
डा. शाहले सापकोटालाई धम्की दिएपछि अस्पतालका कर्मचारीहरुले सहकर्मीबाट नै असुरक्षा बढेको भन्दै अस्पताल व्यवस्थापन समिति र मेसुलाई ध्यानाकर्षण गराएका थिए ।
डा.किरण तिवारी सहितको १५ जना चिकित्सक र स्वास्थ्यकर्मीले अतिरिक्त समयमा खटिएका डाक्टरमाथी उल्टै सेवा दिन नसक्ने डाक्टरले धम्काएको भन्दै डाक्टर शाहलाई कारवार्ही गर्न माग गर्दै ध्यानाकर्षण गराएका थिए । कार्वाही नभए स्वास्थ्य सेवा ठप्प पार्ने उनीहरुको चेतावनी थियो ।
स्वास्थ्यकर्मीहरुको चेतावनी पश्चात बसेको सर्वपक्ष बैठकले उनलाई कार्वाही गर्ने निर्णय गरेको थियो ।
