बागलुङ । लायन्स डिस्ट्रिक ३२५ जे नेपालको दोश्रो क्याबिनेट बैठक बागलुङमा हुने भएको छ । कात्तिक ३० र मंसिर १ गते बागलुङ बजारमा हुने दोस्रो क्याबिनेट बैठकको तयारी पुरा भएको आज पत्रकार सम्मेलन गरि जनाइएको छ । पत्रकार सम्मेलनमा बैठकका बारेमा जानकारी दिँदै प्रचारप्रसार संयोजक गणेशराज लम्सालले बागलुङ बजारमा क्याबिनेट बैठकको तयारी पूरा भएको बताउनुभयो ।
पर्यटकीय क्षेत्रको बिकास र धार्मिक तथा सास्कृतिक क्षेत्रको चिनारी गर्न बैठक उपयोगी हुने विश्वास लिइएको र बागलुङ घुम्ने सन्देश दिने, जिल्लाका १० वटै पालिकाका धार्मिक, प्राकृतिक, सास्कृतिक र पर्यटकीय सम्पदाको प्रचारप्रसार गर्न सहयोग पुग्ने उहाँको भनाई छ ।
युवाहरुको नेतृत्वदायी क्षमताको बिकाससँगै अर्थतन्त्रमा पनि सहयोग मिल्ने विश्वास समेत लिइएको उहाँको भनाई छ । बैठक सम्पन्न गर्नकालागि २० सदस्यीय मुल समिति र १२ वटा बिभिन्न उपसमिति बनाइएको लम्सालले बताउनुभयो ।
बैठक सम्पन्न गर्नका लागि १९लाख ७० हजार आम्दानी र १५ लाख ४३ हजार ५ सय खर्च हुने जानकारी दिदै बचेको रकम समाजसेवामा खर्च गरिने उहाँको भनाई छ । दर्ता शुल्क, शुभकामना लगायत लायन्स सदस्यहरुबाट खर्चकालागि रकम संकलन गरिने उहाँको भनाई छ ।
एरीया मेन्टर नरेश कँडेलले कला संस्कृतिको जगेर्ना गर्नकालागि झाँकीपनि प्रदर्शन हुने बताउनुभयो उहाँले सहभागीहरुलाई स्थानीय उत्पादनको प्रबर्धन गर्न बागलुङमा उत्पादित कोदोको बिस्कुट उपहार दिइने बताउनुभयो ।
डिष्ट्रीक गर्भनर मिलन थापाले आन्तरिक पर्यटन प्रबर्धनकोलागि बागलुङमा बैठक आयोजना गरिएकाले सबै क्षेत्रको साथ र सहयोगको अपेक्षा गरिएको बताउनुभयो । कार्यक्रम प्रचारप्रसार समितिका संयोजक गणेशराज लम्सालको अध्यक्षता, एरिया चिफ चन्द्रराज रेग्मीको धन्यावाद मन्तव्य र सदस्य सचिव उमेश गौतमको संचालनमा सम्पन्न भएको थियो ।।
