बागलुङ ११ पाैष । अन्य जिल्लामा किबी खेतीले बजार र मूल्य नपाएको कृषकहरुले गुनासो गरिरहेको बेला बागलुङमा उत्पादन भएको किबी भने जिल्ला बाहिर निर्यात हुन थालेको छ ।
यहाँको भकुण्डे, बिहुँ, बडिगाड, ढोरपाटन, निसीखोला र दुदिलाभाटी लगायतको स्थानमा उत्पादन भएको किबी निर्यात हुन थालेको छ । मुल्यमा गिरावट आएपनि किबी निर्यात भइरहेको किसानको भनाई छ ।
बागलुङमा उत्पादन भएको किबी बुटवल, पोखरा,काठमाडौं लगायतका स्थानमा निर्यात भइरहेको छ ।
विदेशमा समेत प्रशस्त रुपमा उत्पादन हुने किबी बहुगुणी फल मध्यको पर्दछ । बागलुङको काठेखोला गाउँपालिका–५ बिहुँका खिमानद कँडेलले उत्पादन गरेको किबी बुटवल र काठमाण्डौ पुगेको छ ।
उहाँले किबी बिक्री गर्न थालेको दुई वर्ष भएको छ । कँडेलको १२ रोपनी क्षेत्रफलमा किबी खेती छ ।
यस्तै बागलुङको काठेखोला गाउँपालिका–७ का वडा अध्यक्ष प्रेम लामिछाने, बागलुङ नगरपालिका–९ का वडा अध्यक्ष राजु थापाले समेत यस वर्ष किबी बजारमा पठाउनुभएको छ ।
एक पटकको लगानीले वषौंसम्म आम्दानी दिने बहुगुणी फल किबी प्रति बागलुङका किसानको आकर्षण छ ।
मूल्य सस्तो भएपनि पोखरा, काठमाण्डौ, बुटवल तथा नारायणगढसम्म किबी निर्यात भइरहेको बागलुङका किबी किसानको भनाई छ ।
यस वर्ष एक हजार केजी किबी काठमाण्डौ लगायतको ठूला शहरमा बजारीकरण गरेको किबी किसान खिमानन्द कँडेलले जानकारी दिनुभयो ।
किबीको मूल्य क्रमश घड्दै गएपनि उत्पादन बढ्दै गएको कँडेलको भनाई छ । प्रतिकेजी ३०० मा विक्री हुँदै आएको किबीले क्रमश बजार पाउन थालेपछि यहाँका किसान उत्साहित भएका छन् ।
पछिल्लो समय बसाई सराईका कारण बाँझो जग्गा बढ्दै गएको खेतीयोग्य अन्य जग्गामा समेत काम गर्ने जनशक्ति अभाव भइरहेको सन्दर्भमा जग्गाको सदुपयोग गर्ने प्रमुख माध्यम किबी बनेको छ ।
किबीको उत्पादन बढेपछि ६०० पर्ने किबीको मुल्य भने घटेर ३०० प्रति केजीमा मूल्य झरेको भएपनि नेपालका ठूला शहरमा किबीको माग रहेको वडाअध्यक्ष प्रेम लामिछानेले जानकारी दिनुभयो ।
केही वर्ष पहिलासम्म आयात गरेको किबी विक्री गर्दै आएका बागलुङका फलफूल व्यवसायी अहिले बागलुङकै गाउँ–गाउँमा उत्पादन भएको किबी विक्रि गर्न भ्याइनभ्याई भएको बताउछन् ।
निसीखोला गाउँपालिका–४ स्थित लिला घर्तीले १२ रोपनी क्षेत्रफलमा उत्पादन गरेको किबी सोझै बुटवल पुगेको बताउनुहुन्छ । एक पटक गरेको लगानीले वर्षौसम्म उत्पादन दिने घर्तीको भनाई ।
किबीको नियमित सेवनबाट गर्भवती, रक्तचाप, मुटु र रुघाखोकी लगायतका विरामीलाई विशेष फाइदा पुग्ने भएकाले पनि बजारमा यसको माग बढी भएको स्वास्थ्यकर्मीको भनाई छ ।
