बागलुङ, ७ फागुन । वैज्ञानिक एवं राष्ट्रिय आविष्कार केन्द्रका संस्थापक डा महावीर पुनलाई रु ५० हजार राशिको ‘रत्न–श्रेष्ठ राष्ट्रिय पुरस्कार’ प्रदान गरिएको छ ।
‘रत्न–श्रेष्ठ पुरस्कार गुठी’ बागलुङद्वारा आज आयोजित पुरस्कार समर्पण समारोहमा गुठीका संस्थापक संरक्षक प्रेम छोटाले पुनको अनुपस्थितिमा केन्द्रका प्रतिनिधि इन्द्र वलीलाई नगदसहित, दोसल्ला र सम्मानपत्र प्रदान गर्नुभयो ।
केन्द्रद्वारा प्रकाशित पुनको पुस्तक ‘महावीर पुन सम्झना, सपना र अविरल यात्रा’का लागि पुरस्कार प्रदान गरिएको गुठीले जनाएको छ । राष्ट्रिय आविष्कार केन्द्रको स्थापना, रोजगारी सिर्जना, नवप्रवर्तनका क्षेत्रमा गरेका अनुकरणीय कामले उहाँ परिचित हुनुहुन्छ ।
यस्तै यस वर्षको ‘धवलागिरि प्रतिभा पुरस्कार’ साहित्यकार जगन्नाथप्रसाद लम्साललाई प्रदान गरिएको छ । उहाँको काव्यकृति ‘सहधर्मिणी’का लागि उक्त पुरस्कार प्रदान गरिएको गुठीले जनाएको छ । उक्त पुरस्कारको राशि रु। १५ हजार रहेको छ ।
यस्तै रु। २५ हजार राशिको ‘जगतचन्द्र स्मृति राष्ट्रिय पुरस्कार–२०८१’ पाल्पाका साहित्यकार चोलेश्वर शर्मालाई प्रदान गरिएको छ । रत्न–श्रेष्ठ पुरस्कार गुठीको संरक्षकत्मा सञ्चालित जगतचन्द्र स्मृतिकोषका तर्फबाट प्रदान गरिने उक्त पुरस्कारको राशि रु। २५ हजार रहेको छ ।
शर्माको निबन्ध सङ्ग्रह ‘सगरमाथा एक पहाडको नाम होइन’लाई पुरस्कार प्रदान गरिको गुठीका सदस्यसचिव महेशचन्द्र प्रधानले जानकारी दिनुभयो । पाल्पा तानसेन घर भइ हाल भैरहवा निवासी साहित्यकार विजय सागर श्रेष्ठलाई जगतचन्द्र सम्मान गरिएको थियो ।
सोही समारोहमा बागलुङ नगरपालिका–४ कुँडेलस्थितस्थित मुक्तिनाथ वेद विद्याश्रम संस्कृत विद्यालयका छात्र रामकृष्ण सुवेदीलाई ‘गुरु गणेश स्मृति पुरस्कार’ प्रदान गरिएको थियो । बागलुङका गणेशप्रसाद र विष्णुकुमारी श्रेष्ठको स्मृतिमा गुठीमा स्थापित उक्त पुरस्कारको राशि रु. दस हजार रहेको छ । गुठीले हरेक दुई वर्षमा पुरस्कार प्रदान गर्दै आएको छ ।छोरी चन्द्रकुमारी श्रेष्ठ र ज्वाई भरत कुमार श्रेष्ठ मानव सेवा आश्रम बागलुङमा अक्षय कोष निर्माण गर्न आश्रमका अभिभावक निर्मलबहादुर श्रेष्ठलाई पचास हजार रुपैयाँको प्रदान गरेका थिए ।
साहित्यकार एवं संस्कृतिकर्मी प्रेम छोटाले आफ्नी आमा रत्नकुमारी श्रेष्ठको स्मृतिमा विसं २०३४ मा पुरस्कार स्थापना गर्नुभएको थियो ।
‘रत्न–श्रेष्ठ पुरस्कार गुठी’लाई देशकै जेठोमध्येको एक पुरस्कार संस्था मानिन्छ । भाषा, साहित्य र संस्कृतिको उत्थानमा समर्पित स्रष्टाको सम्मानका लागि पुरस्कार गुठी स्थापना गरिएको संस्थापक संरक्षक छोटाले बताउनुभयो । दिवङ्गत रत्नकुमारी श्रेष्ठको ११७औँ पुण्यतिथि र ४८औँ स्मृति दिवसको अवसर पारेर पुरस्कार वितरण गरिएको गुठीले जनाएको छ ।
कार्यक्रममा डा दिनबहादुर थापाले पुरस्कृत व्यक्तित्वहरु वैज्ञानिक एवं राष्ट्रिय आविष्कार केन्द्रका संस्थापक डा महावीर पुन, साहित्यकार चोलेश्वर शर्मा र साहित्यकार जगन्नाथप्रसाद लम्सालको परिचय दिनु भएको छ ।
धौलागिरि बुहुमुखी क्याम्पसका उपप्रधाध्यापक आनन्द राज सिलवालले साहित्यकार सन्तु श्रेष्ठको कविता संग्रह तरङ्गित तरङ्गमाथि चर्चा गर्नु भएको थियो ।
कार्यक्रम साहित्यकारहरु चोलेश्वर शर्मा,जगन्नाथप्रसाद लम्साल,विजय सागर श्रेष्ठ, गंगा कसजु, सन्तु श्रेष्ठ, नेपाल पत्रकार महासंघ बागलुङका अध्यक्ष राम थापा अविरल, मानव सेवा आश्रमका अभिभावक निर्मलबहादुर श्रेष्ठ, गणेशप्रसाद र विष्णुकुमारी श्रेष्ठको स्मृति कोषका संस्थापक भरत कुमार श्रेष्ठले मन्तव्य व्यक्त गरेका थिए ।
कार्यक्रम रत्न–श्रेष्ठ पुरस्कार गुठी बागलुङका संस्थापक संरक्षक प्रेम छोटाको अध्यक्षता, प्रवन्ध समितिका सदस्य वरिष्ठ अधिवक्ता पद्यनाथ शर्माको स्वागत र सदस्य सचिव महेश चन्द्र प्रधानले सञ्चालन गरेका थिए ।
