बागलुङ , १ पुस । नेकपा (माओवादी केन्द्र ) का उपमहासचिव तथा पूर्वअर्थमन्त्री वर्षमान पुनले दिगो आर्थिक विकास र रोजगारी सृजना गर्ने क्षेत्रमा लगानी आवश्यक रहेको बताउनुभएको छ । उहाँले अनुत्पादक क्षेत्रमा लगानी बढ्दा रोजगारी सृजना हुन नसकेको बताउनुभएको छ ।
नेपाल राष्ट्रिय उद्योग व्यापार संगठन बागलुङ र नेकपा (माओवादी केन्द्र ) बागलुङ नगर समितिको आयोजनामा भएको ‘वर्तमान अवस्था र हाम्रो दायित्व’ विषयक विचार गोष्ठीमा पूर्व अर्थमन्त्रीसमेत रहनुभएका पुनले नेपाल कुनै देशसँग सैन्य गठबन्धनमा नबस्ने बताउदै आर्थिक साझेदार भने हुन सकिने बताउनुभयो ।
अहिले पुँजीबाटको गणतन्त्रबाट समाजवादको गणतन्त्रमा पुग्ने हाम्रो लक्ष्य रहेको बताउदै नेपालको लोकतन्त्रमा भइरहेको कमी कमजोरीलाई सुधार गरेर लैजान आवश्यक रहेको बताउनुभयो ।
उहाँले लोकतन्त्रलाई सुधार गर्न संरचना, नेतृत्व र संगठनको कमी कमजोरीलाई सच्चाउन आवश्यक रहेको जानकारी दिनुभयो । “लोकतन्त्रमा भएका नयाँ आयामलाई स्विकार गर्दै कमी कमजोरीलाई सुधार गर्दै अघि बढ्न आवश्यक छ” पुनले भन्नुभयो “नेकपा माओवादी केन्द्रले जनस्तरबाटै लोकतन्त्रलाई सुधार गर्दै, सुशासन र समृद्ध नेपाल निर्माणको अगुवाई गर्छ ।”
व्यवस्था बदलिएपनि नागरिकको अवस्था परिवर्तन हुन नसकेको स्विकादै नागरिकको अवस्थामा सुधार ल्याउने समाजवाद उन्मुख आर्थिक नीति ल्याउनु अहिलेको मुख्य आवश्यकता रहेको बाउनुभयो ।
समृद्धको बाटोमा नेपाल जानका लागि सुशासन कायम गर्न आवश्यक रहेको बताउनुभयो । रेमिट्यान्सबाट भित्रिएको रकमलाई हामीले सदुपयोग गर्न र कृषि क्षेत्रलाई आधुनिकिरण गर्न आवश्यक रहेको बताउनुभयो ।
पर्यटन र जलश्रोत क्षेत्रलाई प्राथमिकता दिएर अगाडि बढ्नु पर्ने अहिलेको मुख्य आर्थिक कार्यभार भएको उहाँको भनाई थियो ।
अहिले विदेशको सीप र अनुभव र कमाएको रकम देशको प्रगतिमा लगानी गर्न प्रवासी नेपालीको मुख्यको दायित्व भएको र रेमिट्यान्सलाई पुन विदेश पठाउने परम्पराको अन्त्य गर्न आवश्यक रहेको उहाँले जानकारी दिनुभयो ।
कार्यक्रममा नेकपा (माओवादी केन्द्र ) बागलुङका संयोजक राजिव घिमिरेले बागलुङको आर्थिक विकास , रोजगारी सृजना र गरिवी निवारणमा सबैले हातेमालो गर्नु पर्ने बताउनुभयो ।
