बागलुङ, १५ जेठ । कृषि र पशुपालनमार्फत सामाजिक र आर्थिक सशक्तिकरणको अभियानमा जुटेका काठेखोला गाउँपालिका वडा नं. ७ रेशमा गठित मूल महिला समूहले बहिनी समूहलाई बाख्रा उपहार प्रदान गरेका छन् ।
संघर्षशिल, शुभलक्ष्मी र उद्यमी स्वाभलम्बी महिला समूहमा आवद्व सदस्यहरुले उपहार समूहमा आवद्व संघर्षशिल, सयपत्री, सुसेली, लगनशिल, सुर्यमुखी र शुभलक्ष्मी महिला समूहमा आवद्व सदस्यलाई बाख्रा उपहार प्रदान गरेका हुन् ।
हेफर प्रोजेक्ट नेपाल र काठेखोला गाउँपालिकाको आर्थिक तथा प्राविधिक सहयोग र बिवाईसी बागलुङको व्यवस्थापनमा सञ्चालित कृषि तथा पशुविकासमा आधारित साना किसान तथा युवा उद्यमशिलता विकास कार्यक्रमअन्तर्गत गठित मुल समूहका सदस्यहरुले उपहार समूहलाई ५० ओटा बाख्रा प्रदान गरेका हुन् । मंगलबार रेशको नुन्थलामा आयोजित एक कार्यक्रमका बीच महिला समूहलाई बाख्रा उपहार प्रदान गरिएको हो ।
महिलाहरुलाई उत्पादनमा जोड्दै आत्मनिर्भर बनाउने उदेश्यले परियोजनाअन्तर्गत गठित तीन मूल समूह (संघर्षशिल, शुभलक्ष्मी र उद्यमी स्वाभलम्बी महिला समूह) लाई वितरण गरिएका बाख्राबाट उत्पादन भएका पाठापाठी उपहार समूहमा आवद्व सदस्यहरुलाई वितरण गरिएको हो कृषि तथा पशुविकासमा आधारित साना किसान तथा युवा उद्यमशिलता विकास कार्यक्रमका संयोजक चुडामणि उपाध्याले जानकारी दिए ।
कार्यक्रममा बोल्दै काठेखोला गाउँपालिकाका अध्यक्ष राजु थापाले पालिकाले पूर्वाधारभन्दा समावेशी विकासमा जोड दिएको धारणा व्यक्त गर्दै चुल्होचौकोमा सिमित महिलालाई उद्यम व्यवसायमा जोडेर आर्थिक रुपमा सम्पन्न गराउने लक्ष्य सुनाए । ‘सामाजिक तथा आर्थिक रुपमा पछि पारिएका महिलालाई मुल धारमा ल्याउन सिपमुलक तालिम प्रदान गरी पेशा व्यवसायमा जोड्ने हाम्रो लक्ष्य छ’ थापाले भने । पालिकाले नीति तथा कार्यक्रम र बजेट बनाउने तयारी गरिरहेकाले आफ्ना माग पालिकामा जानकारी गराए लक्षित वर्गको क्षेत्रमा कार्यक्रम बनाएर बजेट विनियोजन समेत गरिने थापाले प्रतिवद्वता जनाएका छन् ।
कृषि र पशुपालको क्षेत्रमा आवद्व किसानलाई प्रोत्साहनको लागि उत्पादनमा गाउँपालिकाले अनुदान दिँदै आएको चर्चा गर्दै थापाले विशेष गरी बाख्रापालनमा जोडिएर आत्मनिर्भरको बाटो खोजिरहेका महिला समूहका उत्पादनलाई बजारीकरणमा पनि साथ दिने बचन दिएका छन् । बाख्रापालनको क्षेत्रमा महिलाले देखाएको सक्रियतालाई थापाले प्रशंसा गरेका थिए ।
कार्यक्रममा हेफर इन्टरनेशल नेपालका भरतपुर कलस्टरका कार्यक्रम व्यवस्थापक कृष्ण बहादुर कट्टेलले रेशका महिला समूहले बाख्रापालन र कृषिको क्षेत्रमा गरेका गतिविधिले महिला सशक्तिकरणको क्षेत्रमा सकारात्मक सन्देश प्रवाह गरेको बताए । महिलालाई आर्थिक र सामाजिक रुपमा सशक्त बनाउन हेफर सधैं हातेमालो गर्न तयार रहेको बताउँदै कट्टेलले ग्रामिण क्षेत्रको विकासका लागि पनि महिला उत्पादनमा जोडिन आवश्यक रहेको बताए । बिवाईसी बागलुङका अध्यक्ष तोयानाथ गौतमले बाख्रा उपहार कार्यक्रमले महिलालाई आर्थिक रुपमा सम्पन्न बनाउनुका साथै सामाजिक क्षेत्रमा पनि क्रियाशिल बनाउन प्रभावकारी भूमिका खेल्ने धारणा व्यक्त गरे ।
सो अवसरमा हेफर इन्टरनेशनल नेपालका विवेक कुमार शाह, रन्जित चौधरी, ऋषिराम पौडेल, कृष्णबाबु कट्टेल, गाउँपालिकाका अध्यक्ष, राजु थापा, बिवाईसीका अध्यक्ष तोयानाथ गौतम, धौलागिरि जागरण दैनिकका सम्पादक रामबहादुर जिसी र ढोरपाटन दैनिकका कार्यकारी सम्पादक रामकृष्ण बोहरालाई दोसल्ला ओढाएर सम्मान गरिएको थियो ।
कार्यक्रम शुभलक्ष्मी महिला समूहका अध्यक्ष देवी जिसीको अध्यक्षता, स्वागत धनमाया थापा र उजेली शर्माको सञ्चालनमा सम्पन्न भएको थियो । कार्यक्रम रेश साना किसान सहकारी, संघर्षशिल, शुभलक्ष्मी र उद्यमी स्वाभलम्बी महिला समूहले आयोजना गरेका हुन् ।
