बागलुङ । मंगलबार दिउँसो पहिरोमा परी घाइते भएका बडिगाड गाउँपालिका वडा न। १०का ७८ बर्षीय जोग बहादुर बुढा मगरको मृत्यु भएको छ । समयमै उपचार पाउन नसक्दा बुढाको मृत्यु भएको बताइएको छ ।
उपचारकोलागि हेलिकप्टर मार्फत काठमाण्डौ लैजाने पर्खाईमा रहेका उनको उपचारमा ढिलाई हुँदा मृत्यु भएको हो । खराब मौषमका कारण हेलिकप्टर आउन नसक्दा घाइतेहरुलाई समयमै उपचार पाउन सकेका छैनन् ।
बुढाको ढाड र टाउकोमा चोट लागेको बताइएको छ ।
घाइतेहरुलाई ल्याउन आएको हेलिकप्टर खराब मौषमका कारण बडिगाड जान नसकी बागलुङ सदरमुकाममा रहेको नेपाली सेनाको २३ न। बाहिनीमा अवतरण गरेको थियो ।
बुढासँगै बडिगाडमा भएको बाढी र पहिरोमा परि मृत्यु हुनेको संख्या ८ पुगेको छ । बाढीका कारण वडा न। ९ नयाँ बस्तीका १४ बर्षीय विधान परियार र सोही वडाका खहरे भन्ने ठाउँका २४ बर्षीय गंगा बस्नेतको मृत्यु भएको जिल्ला प्रहरी कार्यालय बागलुङले जनाएको छ ।
वडा न.१०मा पहिरोमा परि मृत्यु हुनेहरुमा ७ बर्षीय मालती बुढा, ७ बर्षी मधु बुढा, सञ्जु बिकको ६ महिनाको छोरी, १२ वर्षीय मनोज बुढा, १२ वर्षीय अमन बुढा र ५९ बर्षीय मैतीदेवी बिक रहेको जिल्ला प्रहरी कार्यालय बागलुङले जनाएको छ ।
वडा न . १०मा भएको घट्नामा परि २६ वर्षीय ओम प्रकाश पुन, ४६ वर्षीया संगीता बुढा, २३ वर्षीया सिर्जना बिक, ४३ वर्षीय मंगलसेन बुढा, १९ वर्षीया रिमा पुन,६० वर्षीया सुमित्रा बिक, ५१ वर्षीय ससिराम बिक, ९ वर्षीय ज्ञाने बुढा, ३१ वर्षीया सिता थापा घाइते भएका छन् ।
घाइतेहरुको प्राथमिक उपचार पछि थप उपचारकोलागि बुर्तिबाङ जिल्ला अस्पताल लगिएको बताइएको छ ।
४ जना बेपत्ता
वडा न. १०मा गएको पहिरोमा परि ४ जना बेपत्ता भएका छन् । बेपत्ता हुनेहरुमा बडिगाड गाउँपालिका वडा न। १०का ६० वर्षीया मधु बुढा, १० वर्षीय मनोज बुढा, ३ वर्षीय आरुष थापा र ११ वर्षीय सुमन बिक रहेको जिल्ला प्रशासन कार्यालय बागलुङले जनाएको छ ।
हाल उनीहरुको खोजी भइरहेको बताइएको छ ।
