बागलुङ मानव बेचबिखन विरुद्दको अठारौं अन्तराष्ट्रिय दिवश बागलुङमा पनि मनाइएको छ । जिल्ला प्रशासन कार्यालय बागलुङको अमयोजना र सामाजिक विकास कार्यालयको सहआयोजनामा दिवश मनाइएको हो । दिवशको अवसरमा सचेतनामूलक र्याली, प्रवचन तथा अन्तरक्रिया कार्यक्रम गरिएको हो ।
कार्यक्रममा बागलुङ नगरपालिकाका उपप्रमुख राजु खड्काले मानव बेचबिखन जस्तो जघन्य अपराधको घटना बढीरहने, तर आम नागरिकले सुरक्षाको उपाय पनि थाहा नपाउने, पीडितले पाउने अधिकार र सेवाका क्षेत्रबारे पनि पहिचान हुन नसक्ने अवस्था रहेको भन्दै ती अन्यौलता चिर्न सबैले साथ दिनुपर्ने बताए ।
कार्यक्रममा प्रमुख जिल्ला अधिकारी नेत्रप्रसाद सुवेदीले मानव बेचबिखन विरुद्दको अपराध विशेषगरी संगठित अपराधको सूचिमा पर्ने भन्दै त्यसका लागि सबै क्षेत्र सचेत रहनुपर्ने बताए । उनले प्रशासन र प्रहरीले गरेका अनुसन्धानमा सामाजिक क्षेत्रको पनि सहयोग चाहिने बताए ।
प्रमुख जिल्ला अधिकारी नेत्रप्रसाद सुवेदीको अध्यक्षता, सामाजिक विकास कार्यालय बागलुङका प्रमुख हिमाल घर्तीको संचालनमा सम्पन्न कार्यक्रममा जिल्ला प्रहरी कार्यालयका प्रहरी निरीक्षक प्रताप पौडेलले नेपाल र जिल्लाभित्रको अपराध अनुसन्धानको तथ्यांक, मानव बेचबिखनका घटना, कानूनी उपचार तथा प्रहरीले गरेको खोजी उद्दार र पुनस्थापनका कार्यक्रमबारे जानकारी गराएका थिए ।
सो अवसरमा जिल्ला सरकारी वकिल पूर्णप्रसाद शर्मा, अधिवक्ताहरु ममतादेवी शर्मा, लक्ष्मी बास्कोटा, सशष्त्र प्रहरी निरीक्षक झपेन्द्र बानियाँले बोलेका थिए । त्यसअघि प्रहरी, सेना, सशष्त्र, निजामती कर्मचारी, अधिकारकर्मी, राजनीतिक दल, अगुवा महिला तथा विद्यार्थीले प्रभातफेरी र सचेतनामुलक व्यानर प्रर्दशन गरेका थिए ।
