बागलुङ , ३ फागुन । शिवरात्रीमा बागलुङका शिव मन्दिरमा भक्तजनको भिड लागेको छ ।
गौरिधाम शिव मन्दिर व्यवस्थापन समितिका अध्यक्ष नारायण केसीका अनुसार दश हजार भन्दा बढि भक्तजन आएको बताउनुभयो । उहाँले बिहान मात्र पाँच हजार भक्तजन आएको बताउनुभयो । केसीले भन्नुभयो पहिला पहिला भक्तजन थोरै आउने गर्नुहुन्थ्यो , अहिले धेरै मात्रामा आउनु भएको छ ।
मन्दिरमा बागलुङ, पर्वत, म्याग्दी लगाएतका भक्तजनको भिड लागेको समितिले जनाएको छ ।
“बिहानेदेखि भक्तजनको लाम लागेको छ, चार जना पूजारीलाई पूजा चलाउन भ्याइनभ्याइ छ”, केसीले भन्नुभयो, “आज रातिसम्मकै मन्दिरमा चहलपहल हुन्छ ।” मन्दिर भजनकीर्तन पनि सञ्चालन भइरहेको अध्यक्ष केसीले बताउनुभयो ।
भक्तजनको सहजताका लागि सुरक्षालगायत पूजा व्यवस्थापन चुस्त बनाइएको उहाँको भनाइ छ । महाशिवरात्रिलाई लक्षित गरी मन्दि परिसरमा नेपाली सेना र बागलुङ नगरपालिकाको स्वास्थ्य शाखाबाट आकस्मिक स्वास्थ्य सेवा पनि प्रदान गरिएको छ ।
हिन्दु धर्मवालम्बीहरुको महाशिवरात्रि पर्वलाई विशेष महत्वका साथ मनाउने गर्छन् । शिवरात्रिको दिनमा भगवान शिवको पूजाआजा भजनकीर्तन गर्ने, उपवास बसेमा मनको कामना पूरा हुने जनविश्वास रहँदै आएको छ। भगवान शिवलाई बेलपत्र, भाङ धतुरो चढाउने परम्परामा पनि रहँदै आएको छ।
