बागलुङ, १३ फागुन । आसन्न फागुन २१ गते निर्वाचनको मिति नजिकिए सँगै रौनक्ता छ ।
यसै क्रममा बागलुङ क्षेत्र नम्बर २ मा प्रगतिशील लोकतान्त्रिक पार्टी (प्रलोपा)का उम्मेदवारले काँग्रेसका उम्मेदवारलाई सघाउने निर्णय गरेका छन । प्रलोपाका उम्मेदवार पदमबहादुर कुँवरले नेपाली कांग्रेसका उम्मेदवार टेकराज पौडेललाई सघाउने भएका छन् ।
बुधबार कांग्रेसका उम्मेदवार टेकराज पौडेलको घोषणापत्र सार्वजनिक कार्यक्रममा बोल्दै उनले यस्तो बताएका हुन् ।
उनले यस क्षेत्रमा प्रत्यक्ष उम्मेदवार पौडेल र समानुपातिक उम्मेदवार रेनुका काउचालाई समर्थन गरेको बताए । उनले अहिलेको निर्वाचन सामान्य नभएको भन्दै यसमा गम्भीर भएर लाग्नुपर्ने बताए ।
तत्कालिन माओबादी केन्द्रका अध्यक्ष हालका नेकपाका संयोजक पुष्पकमल दाहाललाई झापड हानेर चर्चामा रहेका कुँवर माओबादी जनयुद्धमा होमिएका नेताको रुपमा परिचित छन ।
उनि माओबादी नेकपा भएपछि प्रलोपामा रहेका थिए । आफू उम्मेदवार बन्दा राम्रो उम्मेदवारको मत काटिएर पराजित हुनुपर्ने अवस्था आउन सक्ने भन्दै पौडेललाई सघाउने निर्णय गरेको कुँवरको भनाई छ । निसीखोला गाउँपालिका ७ का कुँवर आफ्नो उम्मेदवारी त्यागेर काँग्रेसका उम्मेदवारलाई समर्थन गरेको हुँदा उनिसँगैका अन्य प्रलोपाका नेता कार्यकर्ता पनि काँग्रेसमा समाहित भएका छन ।
“मुलुक परिवर्तनका लागि दश वर्षे जनयुद्धमा होमिए तर अहिले नेताहरू व्यक्तिगत स्वार्थमा लाग्दा जनयुद्धले सार्थकता पाउन सकेन, कुँवरले भने,–“अर्को कुरा दश वर्षे महान् जनयुद्धमा थुप्रै सपनाहरू बाँडेर सत्ताको भ¥याङ बनाएर जनतालाई धोका दिएका तमाम गद्दार नेताहरूलाई जनताले आफ्नो अमूल्य भोटमार्फत झापड हान्नु हुनेछ, जनताले यसपटक गल्ती गर्नुहुँदैन भन्दै फेरिएको काँग्रेसमा समाहित भएर काँग्रेसका उम्मेदवारलाई सहयोग गर्ने निर्णय गरेको हुँ ।
नेपाली राजनीतिको फोहोरी खेलमा कम्युनिस्ट आन्दोलन खराब तरिकाले प्रस्तुत भएको कुँवरले आरोप लगाए । ‘म धेरै खुसी त छैन, जनताको माझमा उम्मेदवार भएको मान्छे, जनताबाट निर्वाचित भएर देशको सेवा गरुँला भन्ने मेरो रहर र इच्छाहरू थिए, तर त्यो परिस्थिति बनेन, त्यसले गर्दा कांग्रेस उम्मेदवारलाई सघाउने छु’ उनले भने ।
कुँवरलाई काँग्रेस बागलुङका सभापति जित शेरचन, यस क्षेत्रका उम्मेदवार टेकराज पौडेल काँग्रेसका नेता द्रोर्णकुवँवर लगायतका नेताले स्वागत गरेका छन ।
