बागलुङ, ३१ वैशाख । बागलुङमा आज देखि गलेश्वर यातायात प्रालिले संचालनमा ल्याइएको छ ।\
बानपा तीन गुठीमा आफ्ना कार्यालय स्थापना गरेर सेवा सञ्चालनमा ल्याएको हो ।प्रालिका अध्यक्ष लक्ष्मण केसीले कार्यालय स्थापना गर्दै यातायात क्षेत्रलाई व्यवस्थित र स्वरोजगार ढङ्गबाट सञ्चालन गर्ने उद्देश्यले कम्पनी स्थापना गरिएको जानकारी दिनुभयो ।
हाल प्रालिमा ३० वटा सवारी साधन आबद्ध रहेका छन् । तीमध्ये २८ वटा पिकअप र २ वटा स्कार्पियो रहेका छन् । बस र टेम्पो बाहेकका अन्य सबै यातायातका साधनलाई प्रालिमा आबद्ध गराउँदै लैजाने योजना रहेको केसीले बताउनुभयो ।
सरकारले रातो नम्बर प्लेटका सवारी साधनले यात्रु बोक्न नपाउने व्यवस्था लागू गरेपछि त्यस्ता सवारीलाई कालो नम्बर प्लेटमा रूपान्तरण गरी व्यवस्थित सञ्चालनका लागि कम्पनी स्थापना गरिएको उहाँले बताउनुभयो ।
प्रालिको पार्किङ तथा टिकटिङ व्यवस्थापनका लागि बागलुङ नगरपालिका संगको समन्वयमा चिप्लेटि बसपार्कमा टिकट काउन्टर स्थापना गरिने भएको छ । यसबाट चिप्लेटि बसपार्कको सदुपयोग हुने विश्वास गरिएको अध्यक्ष केसीले बताउनुभयो ।
कम्पनी स्थापना संगै २५ लाख रुपैयाँको अक्षयकोष संकलन गरिएको बताइएको छ ।
प्रालिका सञ्चालकहरूमा लक्ष्मण केसी, राजु शर्मा, गुरुबहादुर बिक, लोकबहादुर खड्का, चित्र मल्ल रहेका छन् । गण्डकी प्रदेशलाई कार्यक्षेत्र बनाएर प्रालिले सेवा सञ्चालन गर्ने जनाएको छ ।
