बागलुङ, २७ जेठ । बागलुङमा गायक तथा संगीतकार श्रीकृष्णबम मल्ल सम्मानित भएका छन् ।
मल्ल ‘बाबुराम–सरस्वती बज्राचार्य स्मृति कोष’बाट सम्मानित भएका हुन् ।
बुधबार पुरस्कार कोषद्वारा आयोजित समारोहमा बागलुङ नगरपालिकाका उपप्रमुख राजु खड्काले मल्ललाई २५ हजार नगदसहित दोसल्ला र सम्मानपत्र प्रदान गरेका थिए ।
बागलुङको गलकोटमा जन्मिएका मल्ललाई लामो समय देखि गीतसंगीत क्षेत्रमा महत्वपुर्ण योगदान पुर्याएबापत सम्मान गरिएको कोषका अध्यक्ष काजी रोशनले बताए ।
पुरस्कार ग्रहणपछि बोल्दै मल्लले धेरै ठाउँमा आफू सम्मानित भैसके पनि आफ्नै जिल्लामा सम्मानित हुन पाउँदा गौरवको अनुभूति भएको बताए ।
उनले पुरस्कारले आफुलाई गीतसंगीतमा अझै लागिरहन उत्प्रेणा थपेको सुनाए ।
कार्यक्रममा मल्लले आफ्ना ‘पारिपारि आएका ढाका टोपी लाएका,’ हालै सार्वजनिक भएको चलचित्र मितज्युमा समावेश भएको ‘गैराघरे काँइली’ लगाएतका गीत सुनाएका थिए ।
सम्मानित व्यक्तिको परिचय काजी गाउँले श्रेष्ठले दिएका थिए ।
कोषका अध्यक्ष काजी रोशनको अध्यक्षतामा सम्पन्न कार्यक्रममा डा.कृष्णबहादुर श्रेष्ठ, साहित्यकार प्रेम छोटा, बागलुङ नगरपालिकाका उपप्रमुख राजु खड्काले बोलेका थिए ।
कोषका सस्थापक राजन शाक्यको स्वागत, विकास शाक्यले धन्यबाद व्यक्त गरेको कार्यक्रमको संचालन कोषका सचिव ईश्वर बज्राचार्यले गरेका थिए ।
कलाकार बाबुराम बज्राचार्य र उनकी धर्मपत्नी सरस्वती बज्रचार्यको स्मृतिमा उनका परिवारजनले विसं २०६६ मा स्मृति कोष खडा गरेका हुन् ।
