बागलुङ, ११ असोज । बागलुङमा गत भदौ २४ गते भएको जेनजी प्रदर्शनमा बागलुङ नगरपालिकामा २ मा लोकतान्त्रिक चोकमा रहेको बाघको सालिक पुर्ण निर्माण गरिएको छ ।
बागलुङको ऐतिहासिक चिनारी समेटिएको उक्त शिलालेख ‘जेनजी’ सदस्य र शुभेच्छुकहरुबाट आर्थिक सहयोग जुटाएर निर्माण गरिएको ‘जेनजी’ युवा शिशिर जिसीले जानकारी दिनुभयो । उहाँका अनुसार शिलालेख र पेटीमा ढुङ्गा बिछ्याउन झण्डै रु. ७० हजार खर्च भएको बताउनुभयो ।
“शिलालेख निर्माणमा लागेको सबै खर्च जेनजीहरु नै मिलेर उठाएका हौँ, केही विदेशमा रहनुभएका साथीहरुले पनि आर्थिक सहयोग गर्नुभएको छ”, उहाँले भन्नुभयो , “आन्दोलनका क्रममा टुटफुट भएको बाघको सालिकको संरचना जेनजीमार्फत नै पुनःनिर्माण गरिएको छ ।”
तुलनात्मक रुपमा बागलुङको ‘जेनजी’ आन्दोलन शान्तिपूर्ण रहेपनि प्रदर्शनकारीले बाघको सालिकमा रहेको शिलालेख फुटाएका थिए ।
प्रर्दशनकारीले नेपाली कांग्रेस, नेकपा (एमाले) र नेकपा (माओवादी केन्द्र)को जिल्ला पार्टी कार्यालयका बोर्ड, फर्निचर र कागजातमा पनि आगजनी गरेका थिए ।
