बागलुङ, १ कार्तिक। जिल्ला प्रशासन कार्यालय बागलुङले तिहार, नेपाल संवत् र छठ पर्वको अवसरमा आठ बुँदे सचेतना जारी गर्दै राति ९ बजेसम्म मात्र देउसी–भैलो खेल्न अनुमति दिएको छ।
प्रशासनले चाडपर्वहरू खुशीपूर्वक मनाउन, कसैको इच्छा विरुद्ध कार्य नगर्न, तथा समाजमा शान्ति, सुरक्षा र अमनचयन कायम राख्न आग्रह गरेको छ।
देउसी–भैलो लगायतका सांस्कृतिक कार्यक्रमहरू धर्म, संस्कृति र परम्पराप्रति सम्मानजनक ढंगले सञ्चालन गर्न, सार्वजनिक यातायात तथा जनजीवनमा असर नपर्ने गरी मर्यादित र अनुशासित रूपमा राति ९ बजेसम्म सीमित गर्न अनुरोध गरिएको छ।
दीपावलीको अवसरमा विजुली तथा मैनबत्तीको प्रयोग सावधानीपूर्वक गर्न, आगलागी भएमा तुरुन्त सुरक्षा निकायलाई खबर गर्न, सार्वजनिक स्थलमा मादक पदार्थ सेवन, होहल्ला, झैझगडा तथा भीडभाडजन्य गतिविधि नगर्न प्रमुख जिल्ला अधिकारी कुमान सिंह गुरुङले जानकारी दिनुभयो।
त्यसैगरी, सवारी साधनको छतमा बस्ने वा झुण्डिएर यात्रा नगर्न, यात्रुबाट बढी भाडा असुल गर्ने वा दुव्र्यवहार गर्ने सवारी चालकविरुद्ध प्रहरी कन्ट्रोल नम्बर १०० मा सम्पर्क गर्न आग्रह गरिएको छ।
दीपावली मनाउने क्रममा भुईंचम्पा, पटाका, आतिसबाजीजस्ता विस्फोटक पदार्थ तथा नियन्त्रित र निषेधित वस्तुको अवैध आयात, ओसारपसार, बिक्री वितरण तथा प्रयोग नगर्न, जुवाजन्य खेल नखेल्न र कृत्रिम अभाव सिर्जना नगर्न सचेत गराइएको छ।
सूचनाको अवज्ञा गरी कुनै गतिविधि भएमा प्रचलित कानूनअनुसार कारबाही गरिने प्रशासनले स्पष्ट पारेको छ।
