बागलुङ, १ असार । पत्रकार खेमराज गौतम (सुवास)लाई काठेखोला गाउँपालिका अध्यक्ष राजु थापाले समाचारको विषयलाई लिएर धम्की प्रती नेपाल पत्रकार महासघ बागलुङले ध्यानाकर्षण गराएको छ ।
नेपाल पत्रकार महासंघ बागलुङ शाखाले आदर्शसञ्चार डटकमका सम्पादक तथा महासंघका कोषाध्यक्ष खेमराज गौतम ‘सुवास’लाई काठेखोला गाउँपालिकाका अध्यक्ष थापाले दिएको भनिएको धम्कीपूर्ण अभिव्यक्तिप्रति गम्भीर ध्यानाकर्षण भएको जनाएको छ ।
महासंघले एक प्रेस विज्ञप्ति जारी गर्दै मिति २०८३ जेठ २८ गते आदर्शसञ्चार डटकममा प्रकाशित ‘काठेखोलाको वेथिति :आफ्नो डोजर थन्काएर भाडाका डोजर रजाइँ’ शीर्षकको समाचारका विषयमा अध्यक्ष थापाले सम्पादक गौतमलाई टेलिफोन र मोबाइल सन्देश मार्फत अस्वाभाविक दबाब तथा धम्कीपूर्ण अभिव्यक्ति दिएको आरोप लागेको जनाएको हो ।
सम्पादक गौतमले महासंघमा बुझाएको निवेदनका आधारमा विज्ञप्ति जारी गर्दै महासंघले उक्त घटनाबाट स्वतन्त्र प्रेसको अधिकारमाथि गम्भीर खलल पुगेको ठहर गरेको पत्रकार महासंघ बागलुङका सचिव नारायण रिजालले जानकारी दिनुभयो । समाचारप्रति कुनै गुनासो वा असहमति भए कानुनी तथा संस्थागत प्रक्रियाबाट समाधान खोज्नुपर्नेमा पत्रकारलाई धाकधम्की दिनु निन्दनीय र प्रेस स्वतन्त्रता विरोधी कार्य भएको महासंघको भनाइ छ ।
महासंघले पत्रकारको पेशागत तथा भौतिक सुरक्षामाथि प्रश्न उठ्ने गरी भएको घटनाको सत्यतथ्य छानबिन गर्न, दोषीमाथि कानुनी कारबाही गर्न तथा पत्रकारको सुरक्षाको सुनिश्चितता गर्न सम्बन्धित निकायसँग माग गरेको छ । प्रेस विज्ञप्तिमार्फत महासंघले स्वतन्त्र पत्रकारिता र अभिव्यक्ति स्वतन्त्रताको सम्मान गर्न तथा सञ्चारकर्मीमाथि हुने दबाब र धम्कीका घटनाप्रति संवेदनशील बन्न सरोकारवाला पक्षलाई आग्रह गरेको छ ।
