बागलुङ, ७ जेठ । अमेरिकामा बसेर साहित्य सिर्जनामा सक्रिय लेखक सुरेन्द्र रेग्मीको उपन्यास कृति ‘शून्यदेखि पूर्णतासम्म’ सार्वजनिक भएको छ ।
शनिबार धवलागिरि बहुमुखी क्याम्पस, बागलुङमा आयोजित समारोहमा क्याम्पस सञ्चालक समितिका अध्यक्ष प्राडा दिनबहादुर थापाले पुस्तक विमाचन गर्नुभयो । उहाँले प्रवासमा बसेर नेपाली साहित्यको श्रीवृद्धिमा लेखक रेग्मीले पुर्याएको योगदान अनुकरणीय रहेको बताउनुभयो ।
कृतिमाथि समीक्षात्मक टिप्पणी राख्दै क्याम्पसको नेपाली विभागका प्रमुख डा आनन्दराज सिलवालले लेखक रेग्मीले आफ्ना भोगाइलाई पात्रका माध्यमबाट जीवन्त ढङ्गले पुस्तकमा अभिव्यक्त गरेको बताउनुभयो । नवीन चिन्तनसहित लेखिएको उक्त कृतिमा पूर्वीय दर्शनको प्रभाव देखिएको उहाँको भनाइ छ । प्रवासमा रहेका नेपालीहरुको मनोदशालाई उपन्यासमा चित्रण गरिएको उहाँले बताउनुभयो ।
लेखक रेग्मीले कोभिड–१९ महामारीका बेला बन्दाबन्दी हुँदा उपन्यास लेख्न सुरु गरेको बताउनुभयो । “पाँच वर्षको मेहनपछि उपन्यासले साकार रुप लियो, यसमा ५०/६० वर्षअघिको नेपाली ग्रामीण जनजीवनको चित्रणदेखि अध्यात्मसम्मको वर्णन छ”, उहाँले भन्नुभयो, “उच्च शिक्षाका लागि सहर झरेर गर्नुपरेको सङ्घर्ष, विदेशको दुःख र भोगाइलाई पुस्तकले समेटेको छ ।”
विमोचम कार्यक्रममा धवलागिरि बहुमुखी क्याम्पस बागलुङका प्रमुख सह प्राडा सुदर्शन सिलवाल , नेपाल पत्रकार महासंघ बागलुङका अध्यक्ष राम थापा , त्रिभुवन विश्वविद्यालय प्राध्यापक संघ धवलागिरि क्याम्पस इकाईका सभापती भक्तिराम न्यौपाने, विद्यामन्दिर पुस्तकालयका अध्यक्ष रामचन्द्र शर्मा लगाएतले शुभकामना व्यक्त गरेका थिए ।
विमोचन कार्यक्रमका प्रमुख सस्थापक संरक्षक प्राज्ञा प्रेम छोटा.को अध्यक्षता , धवलागिरि बहुमुखी क्याम्पसका सहायक क्याम्पस डिल्लिराज गौतमको स्वागत र प्राध्यापक उदयचन्द्र चापागाईको सञ्चालनमा सम्पन्न भएको थियो ।
