पोखरा, बैशाख २४ गते । मुलुक संघीय संरचनामा गएको पाँच वर्षपछि अञ्चलका नाममा रहेका गण्डकी प्रदेशका अस्पतालको नामबाट अञ्चल हटेको छ । गण्डकी प्रदेश मन्त्रीपरिषदको बैठकले अञ्चलको नाममा रहेका धौलागिरि अञ्चल अस्पताल, गण्डकी अञ्चल आर्युवेद औषधालय र धौलागिरि अञ्चल आयुर्वेद ओषधालयको नाममा रहेको अञ्चल शब्द हटाएको हो ।
मन्त्रीपरिषदको निर्णय सार्वजनिक गर्दै गण्डकी प्रदेशका मुख्यमन्त्री पृथ्वीसुब्बा गुरुङले प्रदेश सरकारले प्रादेशिक, उपप्रादेशिक र जिल्ला अस्पताल तय गर्ने नीति भएपनि हाललाई साविकका अञ्चल अस्पतालको नामबाट अञ्चल शब्द हटाइएको जानकारी दिनुभयो । पोखरामा रहेको पश्चिमाञ्चल क्षेत्रीय अस्पताललाई प्रादेशिक अस्पताल र बागलुङमा रहेको धौलागिरि अञ्चल अस्पताललाई उपप्रादेशिक अस्पताल बनाउँने चर्चा चलेपनि हाललाई अञ्चल शब्दमात्र हटाइएको र मापदण्ड बनाएर अस्पतालको नामाकरण, जनशक्ति लगायतको व्यवस्थापन गरिने मुख्यमन्त्री गुरुङले जानकारी दिनुभयो ।
यस्तै मन्त्रीपरिषदको बैठकले गण्डकी प्रदेशसभाको हिउँदे अधिवेशन अन्त्य समेत गरेको छ । पुस २३ गतेबाट शुरु भएको हिउँदे अधिवेशनको अन्तिम बैठक चैत ६ गते बसेको र कोरोना भाइरसको सम्भावित संक्रमणलाई रोक्नका लागि स्थगित गरिएकोमा त्यसलाई अन्त्य गर्नका लागि प्रदेश प्रमुख समक्ष आव्हान गरेको जानकारी दिनुभयो ।
बैठकले कोरोना भाइरस संक्रमणको संक्रमणबाट कोही कसैको मृत्यु भएमा गरिने शव व्यवस्थापन सम्बन्धी कार्यविधि समेत स्वीकृत गरेको छ । उद्योग वन तथा वातावरण मन्त्रालय अनुसन्धान तथा तैकिकात गर्नका लागि बिभिन्न डिभिजन वन कार्यलयमा कर्मचारी तोकी काम गर्ने रेञ्जरलाई अनुसन्धानको अधिकार तोकेको छ ।
फेवतालमा बन्दै गरेको फेवताल सिल्टेशन डयाम् गण्डकी प्रदेश सरकार महानगरपालिका र उद्योग वन तथा वातावरण मन्त्रालयको सहकार्यमा लाग्ने खर्च ५० प्रतिशत गण्डकी प्रदेश सरकारले बेर्होने र भुक्तानी दिने निर्णय गरेको मुख्यमन्त्री गुरुङले बताउनुभयो । यस्तै नवलपुरको विनयी त्रिवेणी गाउँपालिका वडा नं. ६ र ७ मा पूर्वाधार निर्माणका लागि यस अगाडि प्याकेजमा विनियोजन गरिएको तीन करोड रुपियाँसँगै ति वडामा आवश्यक एम्बुलेन्स खरिदका लागि सैद्धान्तिक सहमति दिने निर्णय समेत भएको छ ।
