काठमाडौँ । बूढानीलकण्ठ नगरपालिकाका तीन वडामा बन्दबन्दी थप कडाइ गरिने भएको छ । बूढानीलकण्ठ १२ स्थित तेञ्जिङ चोकमा बसोबास गर्ने एक १८ वर्षीया युवतीमा कोरोना संक्रमण देखिएसँगै आसपासका तीन वडामा लकडाउनलाई थप कडाइ गरिने नगरपालिकाका प्रवक्ता नवराज भट्टराईले बताउनुभयो । नगरपालिकाका वडा नं १०, ११ र १२ मा संक्रमणको जोखिमलाई ध्यानमा राखेर बन्दाबन्दीलाई प्रभावकारी बनाइने बताइएको छ ।
सर्लाही, रामनगर स्थायी घर भई हाल तेञ्जिङ चोक बसोबास गदैँ आएकी युवतीमा कोरोना भाइरस पोजेटिभ देखिएपछि उनी बसोबास गर्ने क्षेत्रदेखि २५० मिटर वरपर बन्द गरिएको छ । नगरपलिकाका तीन वडाका खुला स्थानमा तरकारी बजार तथा गाडामा तरकारी बिक्रीवितरण पूर्ण रुपमा बन्द गरिएको छ । यसैगरी अत्यावश्यक काम नभई विनाकाममा घर बाहिर निस्केको तथा हिँडडुल गरेको थाहा भएमा कानूनबमोजिम बन्दाबन्दी उल्लंघन गरेको ठहर गरी रु पाँच सय जरिवानासहित कारबाही अघि बढाइने चेतावनी दिइएको छ ।
नगरपालिकाले तोकिएको बाहेकका व्यवसाय तोकिएको समयबाहेक सञ्चालन गरेमा कानूनबमोजिम कारवाही तथा रु एक हजार जरिवानासमेत गरिने नगरपालिकाले जनाएको छ । साथै सो क्षेत्रका मासु पसल पूर्ण रुपमा बन्द गर्ने निर्णय गर्दै अत्यावश्यक सेवा प्रदान गर्ने सवारी साधनले मानिस ओसारपसार गरेको पाइएमा कारबाही गरिने प्रवक्ता भट्टराईले भन्नुभयो ।
