बागलुङ ,९ वैशाख । बागलुङ उद्योग वाणिज्य संघ र अन्तर्राष्ट्रिय बागलुङ समाजबिच बागलुङ जिल्लाको समृद्धिका लागि पर्यटन, कृषि र व्यावसायिक क्षेत्रमा काम गर्ने साझा सम्झौता गरिएको छ।
विश्वभरी छरिएर रहेका बागलुङ मुलघर भएका नेपालीहरुको साझा संस्था अन्तर्राष्ट्रीय बागलुङ सेवा समाजको बागलुङ उद्योग वाणिज्य संघको भवनमा समन्वय कार्यालय स्थापना गरिएको छ ।
अन्तर्राष्ट्रिय बागलुङ समाज अध्यक्ष गंगा शर्मा, उद्योग वाणिज्य महासंघका केन्द्रिय सदस्य युवराज राजभण्डारी, गण्डकी प्रदेश अध्यक्ष नरेश कँडेल, बागलुङ उद्योग वाणिज्य संघका अध्यक्ष राजन कुमार शाक्य लगाएत संघका पदाधिकारी सदस्यको उपस्थितिमा समन्वय कार्यलय स्थापना गरिएको हो ।
बागलुङ जिल्लाको समृद्धिका लागि पर्यटन, कृषि र व्यावसायिक क्षेत्रमा काम गर्ने गरि अन्तर्राष्ट्रिय बागलुङ समाज र बागलुङ उद्योग वाणिज्य संघ विच ८ बुँदे साझा सम्झौता गरिएको संघका महासचिव इन्द्रमणि पौडेल अर्जुनले जानकारी दिनु भयो ।
समाज र संघको सयुक्त पहलमा बागलुङ जिल्लाका १० पालिकामा कृषि, वन, लघुउद्यम, उद्योग पर्यटन, जलस्रोत लगायतका विभिन्न विषय समावेश गरी प्रत्येक पालिकामा दश आयोजनाहरुको सम्भाव्यता अध्ययन गर्न विशेषज्ञ सहितको अध्ययन समिति गठन गरीरे भएको छ ।
जिल्लाका युवा, महिला उद्यमी, एवं नागरिकहरुको भेला गरी वित्तीय साक्षरता एवं उद्योग व्यापार सम्बन्धी परामर्श उपलब्ध गराइने न्यूनतम एक सय वटा व्यवसायिक योजनाको विस्तृत प्रतिवेदन तयार पार्दा लाग्ने प्राविधिक तथा आर्थिक पक्षमा दुवै संस्थाको साझेदारी रहने गरि साझा सम्झौता गरिएको अन्तर्राष्ट्रिय बागलुङ समाज अध्यक्षमा गंगा शर्माले बताउनुभयो ।
योजनाहरुको विस्तृत प्रतिवेदन तयार भईसकेपछि स्थानीय, प्रदेश, र संघीय सरकारका सरोकारवाला प्रतिनिधिहरुको उपस्थितिमा लगानीकर्ताहरुको भेला गरिनेछ जनाइएको छ ।
सम्झौताको उद्देश्य अनुसार काम गर्नको लागि सरकारी निकाय, निजी तथा व्यावसायिक फर्महरु वित्तीय संघ संस्था, देश विदेशमा रहेका विभिन्न समाजहरु, प्राविधिक विज्ञ एवं व्यक्तिहरुसँग सहयोग माग्ने जिल्लाको समग्र विकासका लागि आवश्यकता अनुसार छलफल गरी सहकार्य गरिने भएको छ ।
प्राकृतिक विपद्, महामारी लगायतका समस्याहरुमा आवश्यकताका आधारमा सहकार्य गरी परोपकारी कार्यहरु गरिनेछ र जिल्लाका स्थानीय उत्पादनहरुको ब्रान्डिङ सहित विक्री वितरण गर्नका लागि संघले स्थापना गरेको बागलुङ कोसेली घरको लागि आर्थिक सहयोग एवं बजारीकरणमा समाजले सहयोग गर्ने सहमति गरिएको छ ।
