पोखरा, जेठ २६ गते । कोरोना भाइरस कोभिड १९ को संक्रमण फैलिन नदिन देशभर गरिएको बन्दाबन्दीको समयमा भारतबाट सात हजार बढी मानिस गण्डकी प्रदेशमा प्रवेश गरेका छन् । रोजगारीका सिलसिलामा भारतका विभिन्न शहरमा पुगेका मानिस बन्दाबन्दीकै समयमा गण्डकी प्रदेशमा प्रवेश गरेका हुन् ।
बन्दाबन्दीकै बीचमा भारत सरकारले रेल सेवा सञ्चालन गरेपछि विभिन्न शहरहरुमा पुगेका नेपाल भारत सिमामा आइ स्थानीय तहको सम्पर्कमा जिल्ला प्रवेश गरेका थिए । गण्डकी प्रदेशका आन्तरिक मामिला तथा कानुन मन्त्री हरिबहादुर चुमानले गण्डकी प्रदेशसभाको बैठकमा बैशाख ३१ गतेदेखि जेठ २५ गतेसम्म सात हजार ५९ जना र तेस्रो मुलुकबाट २८ जना गण्डकी प्रदेशमा प्रवेश गरेको जानकारी दिनुभएको थियो ।
नेपाल भारत सिमामा आइपुगेकालाई स्थानीय प्रशासनको समन्वयमा स्थानीय तहको क्वारेन्टाइनमा राख्नेगरी जिल्ला भित्राइएको थियो । ति सबै क्वारेन्टाइनमा बसेकाले अहिले गण्डकी प्रदेशका सबै क्वारेन्टाइनहरु भरिभराउ बनेको मन्त्री चुमानले जानकारी दिनुभयो । कोरोना भाइरस संक्रमण फैलिन नदिनका लागि गण्डकी प्रदेश सरकार प्रतिबद्ध रहेको भन्दै मन्त्री चुमानले स्थानीय स्तरमा क्वारेन्टाइन, आइसुलेसन, एम्बुलेन्सलगायतको व्यवस्थापनका लागि गण्डकी प्रदेश सरकारले बजेट समेत पठाएको जानकारी दिनुभयो ।
मन्त्री चुमानले गण्डकी प्रदेश सरकारले जिल्ला प्रशासन कार्यालय तथा सुरक्षा निकायसँगको सहकार्यमा कोरोना भाइरस कोभिड १९ को जोखिम न्युनिकरणका लागि पूर्व तयारी र प्रतिकार्यका लागि १५–१५ लाख रुपियाँ पठाइएको र पछिल्लो पटक स्याङ्जालाई १५, नवलपुर, तनहुँ, कास्की र बागलुङलाई १०–१० लाख र अन्य जिल्लालाई पाँच–पाँच लाख रुपियाँ विनियोजन गरिएको जानकारी दिनुभयो । जिल्ला प्रशासन कार्यालयलाई पठाइएको उक्त रकम क्वारेन्टाइन निर्माण, गृह अनुगमन, सिमा चेकजाँच, आधारभूत स्वास्थ्य सामग्रीको खरिद, सुरक्षाकर्मी परिचालन लगायतमा खर्च हुने जनाइएको छ ।
आन्तरिक मामिला तथा कानून मन्त्रालयकाअनुसार बागलुङमा एक हजार ७१३ जना, नवलपुरमा एक हजार ४१९, तनहुँमा एक हजार २८५, स्याङ्जामा एक हजार १११, पर्वतमा ४८१, गोरखामा २५०, कास्कीमा २१८, म्याग्दीमा १४३, लमजुङमा १२२ र मनाङ र मुस्ताङमा १÷१ जना भारतबाट भित्रिएका छन् । यस्तै गण्डकी प्रदेशमा एक हजार ६५८ जना तेस्रो मुलुकबाट भित्रिएका थिए । मन्त्रालयका अनुसार कास्कीमा ७४४, स्याङ्जामा १२०, बागलुङमा १९८, गोरखामा १६८, लमजुङमा १०९, म्याग्दीमा ८७, तनहुँमा ७४, पर्वतमा ६८ र नवलपुरमा ६० जना भित्रिएका थिए ।
