बागलुङ , ३० फागुन । बागलुङ नगरपालिका वडा नम्बर १ रामरेखामा रहेको चिल्ड्रेन लाइफ इङ्लिस बोर्डिङ स्कुलले उत्कृष्ट नतिजा हासिल गर्ने विद्यार्थीहरूलाइ पुरस्कृत गरेको छ ।
विभिन्न विधामा उत्कृष्ट नतिजा हासिल गर्ने विद्यार्थीहरूलाई पुरस्कार वितरण र सम्मान गरेको हो ।
पुरस्कार वितरण र सम्मान कार्यक्रममा बागलुङ नगरपालिका प्रमुख बसन्त कुमार श्रेष्ठले खेलकुदले विद्यार्थीको चौचर्फी विकासकालागि महत्वपूर्ण भूमिका खेल्ने बताए ।नगर स्तरीय र जिल्ला स्तरीय राष्ट्रपति रनिङशिल्ड प्रतियोगितामा विद्यालयबाट सहभागी भई विजेता बनेका विद्यार्थीलाई पुरस्कार वितरण र सम्मान गरिएको हो । प्रतियोगितामा स्वर्ण, रजत र काश्य पदक जित्न सफल खेलाडीहरूलाई क्रमशः नगद ८ हजार, ६ हजार र ४ हजार रुपैयाँ नगद सहित सम्मान गरिएको हो । उनीहरुलाई ट्रयाकसुट समेत प्रदान गरिएको थियो ।
पदक विजेता उत्कृष्ट खेलाडीहरूलाई विद्यालयले प्रोत्साहन स्वरूप शतप्रतिशत र ५० प्रतिशत छात्रवृत्ति दिने घोषणा गरेको छ ।
त्यस्तै गण्डकी प्रदेश स्तरीय हिसान कप फुटसल प्रतियोगितामा कास्कीबाट उपाधि जितेर बागलुङ जिल्लाकै साख जोगाउन सफल खेलाडीहरूलाई नगद र ट्राक सहित सम्मान गरिएको छ ।युनिभर्सल सबलाइम एकेडेमीको २३ औँ वार्षिक उत्सवमा आयोजित आधारभूत विद्यालय स्तरीय रनिङशिल्ड हाजिर जवाफ प्रतियोगितामा प्रथम स्थान हासिल गर्ने विद्यार्थीहरू नगद र प्रमाणपत्रबाट सम्मानित भए ।
आठौँ बागलुङ महोत्सवको कथा वाचन प्रतियोगितामा द्वितीय स्थान प्राप्त गर्ने विद्यार्थीलाई सम्मान गरिएको प्राथमिक तह संयोजक जीवन रोका क्षेत्रीले जानकारी दिए ।कार्यक्रममा विभिन्न विधाका खेल प्रशिक्षकहरूलाई नगद तथा प्रमाण–पत्र सहित सम्मान गरिएको थियो ।
कार्यक्रममा नगर शिक्षा अधिकारी धनप्रसाद पोखरेल, जिल्ला खेलकुद विकास समितिका अध्यक्ष कृष्णप्रसाद कँडेलले शुभकामना मन्तव्य व्यक्त गरेका थिए ।
विद्यालय व्यवस्थापन समितिका अध्यक्ष श्रीधर कँडेलको अध्यक्षतामा सम्पन्न कार्यक्रममा स्वागत मन्तव्य प्रिन्सिपल नवराज श्रेष्ठ र सञ्चालन नारायाण प्रसाद पौडेलले गरेका थिए ।
