बागलुङ , १९ चैत्र । बागलुङमा हुन लागेको बागलुङ मिडिया मेलाको तयारी पूरा भएका छ । भोलि शुक्रबारदेखि हुने लागेको मेलाको उद्धाटन गण्डकी प्रदेशका मुख्यमन्त्री सुरेन्द्रराज पाण्डेबाट आउनुहुने भएको छ ।
मेलाको व्यापक प्रचार प्रसार गरिएको र सबै तयारी पूरा भएको नेपाल पत्रकार महासंघ बागलुङ राम थापा ‘‘अविरल’ ले भन्नुभयो, ‘‘मेलामा विभिन्न बौद्धिक व्यक्तित्वहरुबाट विद्धत प्रवचन हुने भएकोले दुई दिनको कार्यक्रममा पत्रकार, संचारकर्मी, बागलुङको बौद्धिक वर्ग, प्राज्ञिक समुदाय, नागरिक समाज, क्याम्पस र विद्यालयका विद्यार्थीको उत्साहजनक रुपमा उपस्थिति हुने भएकोले हामी उत्साहित भएका छौं ।’’ मेला चैत्र २० र २१ गते बागलुङ बजारको जोजोलोपा ब्याङ्केटमा हुँदैछ ।
बागलुङलाई मिडियाको माध्यमबाट उजागर गर्न समृद्ध बागलुङ निर्माणमा हातेमालो गर्दै नीजि क्षेत्रको लगानी भित्राउन मिडिया मेलाको आयोजना गरिएको हो ।
खासगरी बागलुङका पत्रकारहरु जुन नेपालभरका विभिन्न मिडियामा कार्यरत रहेका छन् उनीहरुलाई गृहजिल्लाको समृद्धिमा चासो दिने, पुर्नमिलन गर्ने, निजी क्षेत्र र पालिका बिचको सम्बन्ध बढाउदै बागलुङ बजारको ५० वर्ष पुराना इतिहास झल्काउने तस्बिर समेत प्रदर्शनी गर्ने लगायतको काम गरिने नेपाल पत्रकार महासंघ बागलुङका उपाध्यक्ष सुवास आचार्यले जानकारी दिनुभयो ।
मेलामा ८ सेसनको प्यानल डिस्कसन हुँनेछ भने पुराना सञ्चार सामग्री प्रदर्शन गरिने भएको छ ।
पत्रकारिता, सञ्चार माध्यम, पत्रकारको बदलिदो भूमिका र ग्रामीण पत्रकारिताको महत्व उजागर गर्न र यस क्षेत्रमा सबैको ध्यान केन्द्रीत गर्न मेलाले सघाउनेछ । मेलामा पत्रकार महासंघका पदाधिकारी, गण्डकी प्रदेशका ११ जिल्लाका पत्रकारको समेत उपस्थिति रहने छ ।
मेलामा विद्धत प्रवचन, प्यानल डिस्कसन, बागलुङे पत्रकारहरुको पुनर्मिलन, भित्तेपत्रिका लेखन प्रतियोगिता, तस्बिर प्रदर्शन, लाइभ पेन्टिङ, सञ्चार सामग्री र उपकरणको प्रदर्शनी समेत रहेको छ । मेलामा १७ लाख खर्च हुने अनुमान गरिएको शाखाका कोषाध्यक्ष खेमराज गौतमले बताउनुभयो ।
मेलामा आन्तरिक पर्यटक भित्राएर उनीहरुलाई बागलुङका संचार माध्यम, पुस्तकालय, धार्मिक तथा पर्यटकीय गन्तव्यमा भम्रण गराउने उद्देश्य पनि रहेको शाखाका सचिव नारायण रिजालले जानकारी दिनुभयो ।
मेला प्रर्बद्धनमा सघाउने नीजि क्षेत्रको व्यावसायिक स्टलहरु समेत रहनेछ । मेलामा राष्ट्रिय र स्थानीय कलाकारहरुको सांगितिक प्रस्तुत रहने शाखाका उपाध्यक्ष सृजना पन्तले बताउनुभयो ।
मेलामा २५ हजार जनाले मेलाको अवलोकन गर्ने अनुमान गरिएको आयोजकले जनाएको छ ।
