बागलुङ, १८ चैत । बागलुङ जिल्लाबाट यस वर्षको माध्यमिक शिक्षा परीक्षा (एसईई) मा ४ हजार २ सय ५१ जना विद्यार्थी सहभागी हुने भएका छन्।
शिक्षा विकास तथा समन्वय कार्यालय बागलुङका प्रमुख प्रकाश बन्धु अर्यालका अनुसार सहभागीमध्ये २ हजार १ सय ११ जना छात्रा र २ हजार १ सय ४० जना छात्र रहेका छन्।
जिल्लामा एसईईका लागि २५ वटा परीक्षा केन्द्र तोकिएका छन्। बागलुङमा १ सय १५ सामुदायिक र ३२ संस्थागत विद्यालय गरी जम्मा १ सय ४७ विद्यालय रहेका छन्।
यस वर्ष एसईईमा प्राविधिक धार, साधारण धार, पुराना तथा ग्रेडवृद्धि तर्फका विद्यार्थीहरू पनि सहभागी हुने जनाइएको छ।
प्रमुख अर्यालका अनुसार पछिल्लो समय बसाइँसराइका कारण बागलुङमा अघिल्ला वर्षको तुलनामा विद्यार्थी संख्या केही घटेको छ।
