बागलुङ, २६ साउन । बागलुङका महिलालाई साबुन बनाउने तालिम दिन सुरु गरिएको छ ।
बागलुङ उद्योग वाणिज्य संघको महिला उद्यम विकास समितिले उद्यमीलाई साबुन बनाउन ५ दिने तालिम दिन सुरु गरेको हो ।
तालिममा उद्यमीले आफ्नो लागि उपयोग गर्ने साबुन, कपडा धुने सरफ तथा हात धुने वास समेत बनाउने छन् ।
उक्त तालिम २५ जना उद्यमीका लागि तालिम संचालन गरिएको हो ।
नेपाल उद्योग वाणिज्य महासंघ गण्डकी प्रदेशका अध्यक्ष नरेश कँडेलले तालिमको उद्घाटन गर्दै तालिमबाट उद्यमी र उद्यमीबाट आत्मनिर्भर हुँदै सफल व्यवसायी बन्ने बाटोमा लाग्न आग्रह गर्नुभयो । उहाँले महासंघले पनि थप सीप विकासका लागि साथ र सहयोग गर्ने बताउनुभयो । हरेक प्रकारका उत्पादन स्थानीय रुपमा उत्पादन गर्न सकेमा आयात प्रतिस्थापन हुने र देश विकासका लागि पनि यहाँबाट टेवा पुग्ने कँडेलको भनाई थियो ।
कार्यक्रममा बागलुङ उद्योग वाणिज्य संघका अध्यक्ष राजनकुमार शाक्यले महिला उद्यमीलाई दक्ष बनाएर जिल्लाकै व्यवसाय बढाउने लक्ष्य राखेको बताउनुभयो । त्यसका लागि सबैखाले तालिम दिएर उद्यममा सक्रिय बनाउन पहल गर्ने बताउनुभयो । दक्ष उद्यमीलाई व्यवसाय थाल्न अप्ठ्यारो पर्दा सहुलियत ऋण दिने बैंकको खोजी गरेको उहाँले जानकारी दिनुभयो ।
उद्यम विकास समितिकी अध्यक्ष पिंगला जिसीले विभिन्न श्रोत संकलन गरेर १ लाख ३० हजार रुपैयाँमा ५ दिने तालिम सम्पन्न गर्न लागिएको बताउनुभयो । अन्य उद्यम गरिरहेकाले समेत तालिममा सहभागि हुन चासो राखेको उहाँले बताउनुभयो।
तालिममा सहजीकरण गर्न काभ्रेबाट ममता चौलागाई र विश्वास ढुंगेल प्रशिक्षकको रुपमा आएका छन् । उद्घाटन कार्यक्रम समितिकी अध्यक्ष पिंगला जिसीको अध्यक्षता, महासचिव रम्बादेवी शाक्यको संचालनमा सम्पन्न भएको थियो ।
