बागलुङ, पुस ९ । बागलुङ बजारको शान्ति सुरक्षालाई मध्यनजर गरी बजारका विभिन्न चोकहरुमा जडान गरिएका सिसी क्यामेरा प्रयोग बिहिन बनेका छन् । आवश्यक मर्मत सम्भारको अभावमा चार वर्ष अगाडि उद्योग बाणिज्य संघ बागलुङको पहलमा जडान गरिएका २६ सिसी क्यामेरा मध्य १६ वटा सिसी क्यमेरा प्रयोग बिहिन बनेका हुन् ।
जिल्ला प्रहरी कार्यालय बागलुङमा कन्ट्रोल रुम राखी व्यवसायीक महत्वका चोकहरुमा सिसी क्यामेरा जडान गरिएको थियो । सिसी क्यामेरा जडानपछि बागलुङ बजारको शान्ति सुरक्षामा व्यवस्थापनमा केही सहज भएपनि अहिले विग्रीएपछि समस्या भएको जिल्ला प्रहरी कार्यालय बागलुङले जनाएको छ । सिसी क्यामेराको जडानपछि बजारमा भएका केही चोरीका घटनाहरुमा समेत दोषी पत्ता लगाउन सहज भएको थियो ।
जिल्ला प्रहरी कार्यालय बागलुङका पमुख प्रहरी उपरीक्षक दीपक रेग्मीले जडान गरिएका २६ वटा क्यामेरा मध्य १६ वटाले काम नगरेको बताउनुभयो । बजारको विभिन्न क्षेत्रमा तथा मुख्य प्रवेश क्षेत्रमा जडान भएका क्यामेराले काम गर्न छोडे पछि दशै, तिहार जस्ता चाडपर्वमा चोरी, डकैती जस्ता अपराधजन्य गतिविधि रोकथाम र अनुसन्धानमा समस्या हुने सम्भावना देखिएको छ ।
हाल जिल्ला प्रहरी कार्यालय नजिकैको चोकमा रहेका दुई, हल्लन चोकमा रहेका दुई, अदालत चोकमा रहेको एक, लोकतान्त्रिक चोकमा रहेका दुई, धौलागिरी चोकमा रहेका एक, जिपपार्कमा रहेको दुई, श्रीनगर टोलमा रहेको एक, शिवधारा चोकमा रहेका दुई, लालिगुँरास चोकमा रहेका दुई, देउराली चोकमा जडान गरिएको एउटा सिसी क्यामेरा र ब्याकअप टिभीले समेत काम नगरेको प्रअरी प्रमुख रेग्मीले बताउनुभयो ।
सिसी क्यामेरा मर्मतका लागि तीन लाख ५० हजार रुपियाँ भन्दा बढी खर्च हुने भएकाले खर्च व्यवस्थापनको अभावमा क्यामेरा मर्मत गर्न नसकिएको जनाइएकाे छ ।
