बागलुङ, माघ २२ गते । दक्षिण बागलुङको व्यापारिक केन्द्रको रुपमा परिचित जैमिनी नगरपालिकामा पहिलोपटक पक्की सडक निर्माण थालिएको छ । नगरपालिकाले नगरको केन्द्र कुश्मीसेरा बजार र बागलुङ जिल्ला सदरमुकाम बागलुङ बजारलाई जोड्ने सडकलाई पक्की बनाउँन थालेको हो ।
एक दशक अगाडिनै ट्रयाक खुलेको बागलुङ–कुश्मीसेरा खण्डको मुख्य सडक वर्षाद्को समयमा हिलाम्मे र हिउँदको समयमा धुलाम्मे हुँदा यातायात सञ्चालनमा कठिनाई हुने गरेकाले योजना बनाएर सडक कालोपत्रे गर्ने कामको सुरुवात गरिएको नगरपालिकाले जनाएको छ । नगरपालिकाले पहिलो चरणमा सडक कुश्मीसेरा प्राथमिक स्वास्थ्य केन्द्रलाई केन्द्र मानेर उक्त सडक खण्डको भव्रिखेतदेखि जुम्लीखोलासम्मको सडक कालोपत्रे गर्ने प्रक्रिया अगाडि बढाइएको नगरपालिकाका प्रमुख प्रशासकीय अधिकृत ईश्वरीप्रसाद शर्माले जानकारी दिनुभयो ।
स्थानीय पुर्वाधार विकास साझेदारी कार्यक्रममार्फत प्राप्त एक करोड रुपियाँ र नगरपालिकाको साझेदारी एक करोड रुपियाँ गरी दुई करोड रुपियाँको लागतमा उक्त खण्डको एक हजार छ सय मिटर सडक कालोपत्रे गर्नका लागि टेण्डर प्रक्रिया अगाडि बढाइएको शर्माले बताउनुभयो । बागलुङ–कुश्मीसेरा सडक खण्डको २१ किलोमिटर मध्य बागलुङ नगरपालिका भित्र पर्ने चार किलोमिटर कालोपत्रे र कुश्मीसेरा नजिकैको जुम्लीखोलामा ३७ मिटर ढलान सडक बाहेक अन्य सडक कच्ची अवस्थामा रहेको छ ।
नगरको केन्द्रदेखि केही तल भएर जाने कालिगण्डकी करिडोर केही वर्ष भित्रै कालोपत्रे हुनेगरी काम भइरहेको र नगरपालिकाको केन्द्र कुश्मीसेरा बजार भित्र स्थानीयको ४० प्रतिशत र नगरपालिको ६० प्रतिशत लगानीमा सडक कालोपत्रे गर्ने योजना भएकाले त्यहाँदेखि करिडोरसम्मको सडक कालोपत्रे गरेर सदरमुकामसम्म सहज यातायातको प्रबन्ध गर्न लागिएको नगरप्रमुख इन्द्रराज पौडेलले बताउनुभयो ।
‘हामीले बजारभित्र र आसपासको सडक उपभोक्ता समितिमार्फत कालोपत्रे गर्ने योजनामा छौ, झण्डै एक किलोमिटर सडकको लागि नगरपालिकाले उपभोक्ताहरुसँग सहकार्य गरेर थोरै भएपनि हाम्रो जैमिनीमा कालोपत्रे सडक छ भन्ने बनाउँछौं ’ नगरप्रमुख पौडेलले भन्नुभयो । बागलुङमा रहेका चारवटा नगरपालिका मध्ये जैमिनी नगरपालिका मात्रै कालोपत्रे सडक विहिन नगरपालिका हो । जिल्ला सदरमुकाम रहेको बागलुङ नगरपालिकाका केही सडक कालोपत्रे भएका छन् भने गल्कोट नगरपालिका र ढोरपाटन नगरपालिकामा मध्यपहाडी लोकमार्ग कालोपत्रे भएको छ ।
नगरपालिकाका उपप्रमुख लिला रानाले बागलुङ–कुश्मीशेरा सडक खण्डको सरङ्गेसम्मको सडकलाई कालोपत्रे बनाउने बनाएर नगरपालिका अगाडि बढेको बताउनुभयो । एशियाली बिकास बैंकको सहयोगमा एक दशक अगाडि ट्रयाक खुलेको बागलुङ–कुश्मीशेरा सडकखण्ड लामो समयसम्म कालोपत्रे नभएका कारण बागलुङको दक्षिणका जनताले कष्टपूर्ण यात्रा गर्दै आएका छन् ।
