बागलुङ, फागुन ८ गते । गाउँ नजिकै रहेको विद्यालयको वार्षिकोत्सव हर्षोल्लासका साथ मनाएर घर फर्कदै गरेका बालिकाको मृत्युपछि छिस्तीको केवै गाउँ शोकमा डुवेको छ । मंगलबार साँझ जैमिनी नगरपालिका वडा नंं ८ छिस्तीमा स्थित जनकल्याण माध्यामिक विद्यालयको वार्षिकोत्सव मनाएर घर फर्कदै गरेका बालबालिका र अभिभावक सवार जिप दुर्घटना हुँदा एउटै गाउँका चार जनाको मृत्यु भएपछि केवै गाउँ शोकमा डुवेको हो ।
दिनभर वार्षीकोत्सवको रमाईलोमा भुलेका विद्यार्थी, अभिभावक र शिक्षक हर्षित मुद्राका साथ साँझ घर फर्किदै थिए । खुःसीका साथ घर फकिर्दै गरेका विद्यार्थीको खुःसी भने छिनभरपनि टिक्न सकेन्, विद्यालय रहेको छिस्तीको–७ रापुङबाट घरतर्फ हिडेको तीन–चार मिनेटमै ध १ ज ७९१ नम्बरको पिकअप दुर्घटनामा परेको थियो । दुर्घटनामा परी सोही विद्यालयमा अध्ययनरत तीन बालिका र एक विद्यालयकै लेखापालको मृत्यु भएको छ भने १० जना बढी घाइते अवस्थामा रहेका छन् । मृतक र घाइते अधिकांश एउटै गाउँका भएकाले पनि केवै गाउँ शोकमा डुबेको स्थानीय डिलबहादुर श्रीसले बताउनुभयो । विद्यालयको वार्षीकोत्सव साँझ मात्र सकिएपछि विद्यालयदेखि करिब एक घण्टाको दुरीमा रहेको गाउँ पुग्नका लागि बालबालिका र महिलाहरु उक्त जीपमा चढेका थिए ।
‘हामी पाका मान्छेहरु हिडेर जान्छौं भनेर जिप चढेनौं, महिला, बालबालिका र केही युवाहरु जिप चढेर गन्तव्यतर्फ जाँदै थिए, बाटो उकालो भएका कारण ओभर लोडका कारण जिपले पिकअप लिन नसकेपछि दुर्घटना हुने भयो भनेर यात्रुलाई जिपबाट ओर्लन भन्यौं युवा र सहज ठाउँमा बसेका बालबालिकाहरु हामफाले तर जिप भित्र र अप्ठ्यारो ठाउँमा कोचिएर बसेकाहरु आफ्नै आँखा अगाडि जीपसँगै भरिबाट खसे ।’ प्रत्यक्षदर्शी श्रीसले भन्नुभयो ।
उकालो बाटो, ओभरलोड र सिकारु चालकका कारण दुर्घटना भएको प्रहरीको भनाई छ ।
चालक प्रविन सोही विद्यालयको कक्षा नौंमा अध्ययन गर्ने छात्र भएको घाइते बालबालिकाहरु बताउँछन् । दुर्घटनामा विद्यालयका लेखापाल ३० वर्षीय तुलसी पुन (टिका), १९ वर्षकी प्रियङ्का पुन सोही विद्यालयमा अध्ययनरत बालिका १३ वर्षीय ज्योती पुन र १४ वर्षीय एलिना पुनको मृत्यु भएको थियो । मृतक ज्योती पुन र प्रियङकाको धौलागिरी अञ्चल अस्पतालमा ल्याउँदै गर्दा बोटामा र तुलसी र एलिनाको घटना स्थलमा मृत्यु भएको जिल्ला प्रहरी कार्यालय बागलुङका प्रहरी नावय उपरीक्षक (डिएपी) चिरञ्जीवि कोईरालले जानकारी दिनुभयो ।
दुर्घटनामा गम्भिर घाइते भएका ३० वर्षीय धनकला श्रीस, १६ वर्षीय विष्ना श्रीस, १३ वर्षीय संगम श्रीस र १२ वर्षीय सम्झना पुनलाई थप उपचारका लागि पोखरा स्थित मणिपाल शिक्षण अस्पतालमा र अन्य घाइते १५ वर्षीय तृष्ण पुन, १२ वर्षीय सविना थापा, ११ वर्षीय निर्मल पुन, १२ वर्षीय पूजा पुन, ५० वर्षीय नन्दकली पुनको धौलागिरी अञ्चल अस्पतालमा उपचार भैरहेको जिल्ला प्रहरी कार्यालय बागलुङका सूचना अधिकारी डिएपी चिरञ्जीवि कोईरालले जानकारी दिनुभयो । जीप चालक १८ वर्षीय प्रविन पुन र जीपमा सवार १३ वर्षीय विशाल परियार सामान्य उपचारपछि डिस्चार्ज भएका छन । चालक पुन प्रहरीको नियन्त्रणमा रहेको डिएपी कोईरालले जानकारी दिनुभयो ।
