बागलुङ, फागुन १० गते । पूर्वप्रधानमन्त्री एवं नेपाल कम्युनिष्ट पार्टी (नेकपा)का अध्यक्ष पुष्पकमल दाहाल प्रचण्डले व्यवस्थापकीय काम सकिएकाले अब विकासले गति लिने बताउनुभएको छ । नेपाल माध्यामिक विद्यालय ताराखोला बागलुङको स्वर्ण महोत्सवको उद्घाटन गर्दै प्रचण्डले नयाँ संविधानको कार्यान्वयन, ऐन कानुनको निर्माण र अन्य व्यवस्थापकीय काम सकिएकाले अब सरकारको ध्यान तिव्र विकासमा हुने बताउनुभएको हो ।
नेपालको राजनीतिक परिवर्तनपछि संविधान निर्माणको चुनौती पूरा भएपनि त्यसपछि गर्नुपर्ने थुप्रै व्यवस्थापकीय काम र ऐन कानून निर्माणमा सरकारले बढी ध्यान दिनुपर्दा विकास निर्माणको कामले गति लिन नसकेको भन्दै अध्यक्ष प्रचण्डले महत्वपूर्ण कामहरु सकिएकाले अब देशले विकासको गति लिने बताउनुभएको हो । ‘हामीले चुनौतीपूर्ण भनिएको संविधान निर्माण ग¥यौं, संविधान अनुसार तीनै तहका निर्वाचन सम्पन्न भए, मुलुकको दुरगामी परिवर्तनका लागि संघीयता कार्यान्वयन र समावेशीता लागू गरेका छौं, अब व्यवस्थापकीय काममा नअल्झी सुखी नेपाली समृद्धि नेपालको अभियानलाई तिव्रता दिन सरकार लागिपर्छ ।’ प्रचण्डले भन्नुभयो ।
लामो समयको राजनीतिक संक्रमणकाल, छिमेकी चिन र भारतबीचको सम्बन्ध, खस्कदो मूलुकको औद्योगिकरण, रेल, जलमार्ग, हवाइमार्ग हुँदै विश्वभरी व्यापारा गर्न पाउँने व्यवस्था वर्तमान सरकारले गरेकाले अबका दिनमा कुनै झन्झटमा नफसी मुलुक समृद्धिको काम गर्न सकिने उहाँको भनाई थियो । सरकारले शिक्षा, स्वास्थ्य तथा रोजगारीलाई मौलिक अधिकारको रुपमा व्याख्या गरेकाले सोही अनुसार ऐन कानुन बनेको भन्दै अध्यक्ष प्रचण्डले अब कसैलेपनि पैसाको अभावमा अध्ययन गर्न, उपचार गर्न नसक्ने अवस्थाको अन्त्य गरिएको बताउनुभयो । सरकारको ध्यान नेपालबाट वैदेशिक रोजगारीका लागि बाहिरिने युवाहरुलाई स्वदेशमै फर्काउँनु रहेकाले अब देशमै रोजगारी सिर्जना गर्ने, यदि रोजगारी प्राप्त हुन नसके वेरोजगार भत्ता दिने प्रधानमन्त्री रोजगार कार्यक्रमको सुरुवात भएकाले अब स्वदेशमै बसेर काम गर्न सबैलाई आग्रह गर्नुभएको थियो ।
तत्कालिन दुई कम्पयुनिष्ट पार्टीबीचको एकीकरण मुलुकको आवश्यकताका आधारमा भएको भन्दै अध्यक्ष प्रचण्डले अब तत्काल पार्टी एकता प्रक्रिया टुङ्गाइने बताउनुभएको थियो । ‘हामी आजमात्रै काठमाडौंमा पार्टीको सचिवालय बैठक बसेर पार्टी एकता प्रक्रियालाई तत्काल टुङ्गाएर सबै कमिटिहरु सक्रिय बनाउँने विषयमा निर्णय भएको छ, अबको केही दिनमा पार्टी एकता प्रक्रियाले टुङ्गीन्छ ।’ अध्यक्ष प्रचण्डले भन्नुभयो ।
