बागलुङ, फागुन ११ गते । दुरसञ्चार सेवा प्रदायक निजी क्षेत्रको मोवाइल कम्पनी एनसेलले बागलुङमा निर्माण गरिएका तीन वटा टावरमा अज्ञात समूहले आक्रमण गरेको छ । एनसेलले आफ्नो सेवा प्रदान गर्नका लागि बागलुङ नगरपालिका, गलकोट नगरपालिका र निसीखोला गाउँपालिकामा निर्माण गरिएका टावरमा अक्रमण गरिएको हो ।
अज्ञात समूहले बागलुङ नगरपालिका वडा नं. ७ को डाँडाखेत, गलकोट नगरपालिका वडा नंं ८ को काँडेवास र निसीखोला गाउँपालिका वडा नं. ७ मा निर्माण गरिएको टावरमा आक्रमण गरी त्यहाँ राखिएको जेनेरेटर लगायतका उपकरण जलाएर नष्ट गरिदिएको जिल्ला प्रहरी कार्यालय बागलुङका सूचना अधिकृत चिरञ्जीवी कोइरालाले जानकारी दिनुभयो ।
आगलागी गरिएका अधिकांश स्थान ग्रामिण क्षेत्र भएकाले आगालागी लगत्तै प्रहरीको टोली घटनास्थल पुगि अनुसन्धान गरिरहेको कोइरालाले जानकारी दिनुभयो । रातको समयमा अज्ञात समूहले टावरमा आक्रमण गरिएको भनिएपनि अहिलेसम्म घटनाको कसैले जिम्मेवारी लिएको छैन ।
