भदौ २५ गते । भेटेरिनरी अस्पताल तथा पशु सेवा विज्ञ केन्द्र बागलुङले मोडेल फार्म स्थापना गर्न डेढ करोड रुपैँया भन्दा बढी रकम विनियोजन गरेको छ । कार्यालयले आर्थिक बर्ष ०७६-७७ को कार्यक्रम सार्वजनिकरण गर्दै मोडेल फार्म स्थापना गर्नका लागि १ करोड ६० लाख रुपैँया बिनियोजन गरेर काम अगाडी बढाइसकेको बताएको छ ।
मोडेल फार्मका लागि हाल सम्म बागलुङ र पर्वत जिल्लाका गरी ३ सय ५८ वटा निवेदन दर्ता भएको छ । कार्यालयमा आएको कुल बजेटको ५० प्रतिशत भन्दा बढी रकम यही कार्यक्रमका लागि बिनियोजन भएको बरिष्ठ पशु विकास अधिकृत शम्भुराज पाण्डेले बताउनुभयो ।
२० वटा फार्मका लागि बजेट बिनियोजन भएको भएपनि मन्त्रालय संग समन्वय गरी ३२ वटा सम्म छनौट गर्न सक्ने व्यवस्था मिलाउने पाण्डेले बताउनुभयो । पुँजीगत खर्चका लागि १७ लाख १० हजार र चालु खर्चका लागि ३ करोड ९४ लाख ७४ हजार रुपैँया बिनियोजन भएको पनि सो अवसरमा जानकारी गराइएको छ ।
यस्तै कार्यालयले यस बर्ष नयाँ कार्यक्रममा पाडा हुर्काउने कार्यक्रम समावेश गरेको छ । यसका लागि ५ लाख रुपैँया बिनियोजन भएको छ । यस्तै पशु स्वास्थ्य कार्यक्रममा पुर्ण खोपयुक्त वडा घोषणाका लागि १४ लाख, पिपिआर रोग विरुद्धको खोप लगाउन ११ लाख, औषधी खरिदका लागि ४ लाख ५० हजार, पशु स्वास्थ्य तथा बाझोपन निवारण शिविरमा ४ लाख ५० हजार रुपैँया रहेको छ । यस्तै वर्ड फ्लु सर्भिलेन्स तथा नमुना संकलन, रानीखेत रोग विरुद्धको खोप सञ्चालन लगायतका कार्यक्रमहरु समावेश गरिएको छ ।
यस्तै पशु आहारा कार्यक्रमका लागि १३ लाख ५० हजार, पशु प्रजनन तथा नश्ल सुधारका लागि ९ लाख ५० हजार, मत्स्यविकास कार्यक्रममा ९ लाख ५० हजार, पशुपंक्षी बजार प्रबद्र्धन कार्यक्रममा ७ लाख ५० हजार शुशासन र व्यवस्थापनका लागि १५ लाख रुपैँया, सीप विकास तथा जनचेतना तालिम, गोष्ठीका लागि १६ लाख २५ हजार रुपैँया छुट्याएको बताइएको छ ।
कार्यक्रममा जिल्ला समन्वय समितिका उपप्रमुख बिष्णु भुषाल, प्रमुख जिल्ला अधिकारी लुकबहादुर क्षेत्री, बागलुङ दुग्ध उत्पादक संघका अध्यक्ष दिपक गौतम, नेपाल पत्रकार महासंघ बागलुङका अध्यक्ष दिल शिरिष, पर्वतका अध्यक्ष छविलाल तिवारी लगायतले बोल्नुभएको थियो । कार्यक्रम बरिष्ठ पशु विकास अधिकत पाण्डेको अध्यक्षता, पशु विकास अधिकृत निलकण्ठ शर्माको स्वागत र पशु चिकित्सक रामजी प्रसाद पौडेलको सञ्चालनमा सम्पन्न भएको थियो ।
