नेपालसञ्चार पोखरा, असोज १६ गते । राष्ट्रपति विद्यादेवी भण्डारीले पर्यटन वर्ष सफल पार्नका लागि पूर्वाधारको व्यवस्थापनमा ध्यान दिन आग्रह गर्नुभएको छ । गण्डकी प्रदेशको आन्तरिक भ्रमण वर्ष–२०१९ का लागि राष्ट्रपतिलाई निम्तो दिन पुगेको गण्डकी प्रदेश सरकारका मन्त्री सहितको टोलीलाई पर्यटन पूर्वाधार विकासमा ध्यान दिन आग्रह गर्नुभएको हो ।
नेपालमा थुप्रै पर्यटकीय गन्तव्यहरु भएपनि प्रचार प्रसारको अभावमा पर्यटकहरु पुग्न नसकेको र भएका पर्यटकीय स्थलहरुमा पूर्वाधार विकासको अभावमा ओझेलमा परेको भन्दै त्यस्ता पर्यटकीय गन्तव्यहरुको पहिचान गरी पूर्वाधार निर्माणमामा जोड दिन आग्रह गर्नुभएको थियो ।
गण्डकी प्रदेश भित्र थुप्रै पर्यटकीय स्थलहरु रहेको उल्लेख गर्दै राष्ट्रपति भण्डारीले एउटा पर्यटकीय स्थलदेखि अर्को पर्यटकीय स्थलसम्म पुग्ने सडकलाई सहज बनाउँन आग्रह गर्नुभएको थियो । राष्ट्रपति भण्डारीलाई गण्डकी प्रदेश सरकारका उद्योग, पर्यटन, वन तथा वातावरणमन्त्री विकास लम्सालले गण्डकी प्रदेश सरकारले सन् २०१९ लाई आन्तरिक भ्रमण वर्ष, सन् २०२० नेपाल भ्रमण वर्ष सँगै छिमेकी पर्यटन वर्ष, सन् २०२१ लाई पर्यटन पूर्वाधार निर्माण वर्ष र सन् २०२२ लाई अन्तर्राष्ट्रिय पर्यटन वर्षको रुपमा मनाउँन लागेको जानकारी गराउँनुभएको थियो ।
आन्तरिक पर्यटन वर्ष २०१९ लाई सफल पार्नका लागि देशका विभिन्न ठाउँमा पुगेको गण्डकी सरकारका उद्योग, पर्यटन, वन तथा वातावरणमन्त्री विकास लम्सालको नेतृत्वको टोलीले प्रदेश नम्बर एक, दुई र तीनका मुख्यमन्त्री, त्यहाँका व्यवसायीसँग अन्तरक्रिया गरी काठमाडौं पुगेको मन्त्री लम्सालले जानकारी दिनुभयो ।
‘अहिले हामी काठमाडौं आइपुगेका छौं, अन्य प्रदेश सरकारका मुख्यमन्त्री, मन्त्री तथा उद्योगी व्यवसायीहरुबाट राम्रो साथ र सहयोग पायौं, राष्ट्रपतिलाई गण्डकी प्रदेश भ्रमणको निम्ता दिएका छौं, अब प्रधानमन्त्री, मन्त्री तथा अन्य सरोकारवालासँग छलफल गरी गण्डकी प्रदेशको पर्यटन विकासका लागि के गर्न सकिन्छ भन्ने बारेमा योजना बनाएर अगाडि बढ्छौं ।’ मन्त्री लम्सालले भन्नुभयो ।
