पोखरा, बैशाख २२ गते । संसारकै लामो दावी गरिएको बागलुङ– पर्वत दुई जिल्ला जोड्ने झोलुङ्गे पुललाई ‘गिनिज बुक अफ द वल्ड’मा दर्ता गर्ने प्रक्रिया सुरु गरिएको छ । बागलुङको बागलुङ नगरपालिका वडा नं. १ बाङ्गेचौर र पर्वतको कुश्मा नगरपालिका वडा नं. १ पाङ अदुवावारी जोड्ने ५६७ मिटर लामो उक्त पुल सिङ्ल स्पानमा संसारकै लामो पुल दावी गर्दै गिनिज बुक अफ द वल्ड रेकर्डमा दर्ता गर्ने प्रक्रिया सुरु गरिएको हो ।
बागलुङ नगरपालिकाको नगर कार्यपालिकाको बैठकले सिङ्गल स्पानमा हालसम्म निर्माण गरिएका पुलहरु मध्य उक्त पुल संसारकै लामो भएको दावी सहित दर्ता प्रक्रिया सुरु निर्णय गरेको नगरप्रमुख जनकराज पौडेलले जानकारी दिनुभयो । कोरोना भाइरस कोभिड १९ को संक्रमण फैलिन नदिन गरिएको बन्दाबन्दीकै बेला निर्माण स्थललाई पूर्ण रुपमा बन्द गरेर सम्पन्न उक्त पुल बन्दाबन्दी खुल्दासाथ हस्तान्तरण गर्न लागिएको छ ।
बागलुङ र पर्वतको दुई ढिक जोड्नेगरी कालीगण्डकी नदी माथि निर्माण गरिएको ५६७ मिटर लामो र १३८ मिटर अग्लो पुलले विश्वकै ध्यान आकर्षण गर्ने अपेक्षा गरिएको छ । राष्ट्रिय गौरवको आयोजना मध्यपहाडी लोकमार्ग, उत्तरदक्षिण कालीगण्डकी करिडोरको ठिक माथि निर्माण गरिएको उक्त पुलको विभिन्न भागमा रङ्गीचङ्गी वत्तिहरु जडान गरिने भएकाले रातको समयमा पुल आकर्षित बन्ने नगरप्रमुख पौडेलले बताउनुभयो । पुलबाट धौलागिरि हिमाल, प्रसिद्ध बागलुङ कालिका मन्दिर, पञ्चकोटलगायत पवित्रि कालिगण्डकी नदीका थुप्रैै भुभागहरु देख्न सकिन्छ ।
रङ्गीचङ्गी बत्ति जडान गरिने उक्त पुल वि.सं. २०७७ साल असार मसान्तसम्म सम्पन्न गर्ने गरी २०७५ चैतमा निर्माण सुरु गरिएको थियो । पुल निर्माणको जिम्मा पाएको थानी÷बिएलटी÷हिमशिखर कन्स्ट्रक्सनका आधिकारिक प्रतिनिधी नरहरी खड्काले पुल निर्माणका लागि आवश्यक पर्ने सामग्रीहरु पहिलेनै राखिएको र कामदार समेत रहेकाले बन्दाबन्दीका बेलामा पुल निर्माण सकेर हस्तान्तरणको तयारी गरिएको बताउनुभयो ।
उक्त पुल करिब नौ करोड २५ लाख रुपियाँमा निर्माण सम्पन्न भएको सस्पेन्सन ब्रिज डिभिजन कार्यालय काठमाडौं ठेक्का व्यवस्थापन शाखाका इन्जिनियर सागरराम नेपालले जानकारी दिनुभयो । झोलुङ्गे पुलको लठ्ठा बाहेक अन्य सामग्री खरिद तथा निर्माणका लागि छ करोड ९१ लाख रुपियाँमा निर्माण कम्पनीसँग ठेक्का सम्झौता गरिएको र कार्यालयले लठ्ठा खरिदका लागि दुइ करोड १८ लाख र ल्याव टेष्ट तथा अन्य कामका लागि करिब १६ लाख रुपियाँ खर्च भएको नेपालले बताउनुभयो ।
यस्तो प्रकृतिको पुल नेपालमा थुप्रै बनेपनि यति लामो पुल नेपालमा पहिलो पटक निर्माण भएको नेपालले बताउनुभयो । ‘हामीले यस्ता धेरै पुलहरु बनाएका थियौं, तर ३०० मिटर भन्दा लामो पुल मध्य यो सबैभन्दा लामो पुल हो, पुलको लठ्ठा तान्नका लागि केही समस्या हुने भएपछि चिनबाट लठ्ठा तान्ने मेसिन खरिद गरेर पुल निर्माणलाई अगाडि बढाएका थियौं ।’ नेपालले भन्नुभयो ।
पुल निर्माणपछि दुई जिल्लाको पर्यटन तथा आर्थिक विकासमा ठूलो टेवा पुग्ने बागलुङ नगरपालिकाका नगरप्रमुख पौडेलले बताउनुभयो । वि.सं. २०५९ सालदेखि नै पुल निर्माणका लागि सम्भाव्यता अध्ययन गरिएकोमा लम्बाई लामो हुने भन्दै निर्माण हुन नसकेकोमा चिनबाट लठ्ठा तान्ने प्रविधि भित्रिएसँगै पुल निर्माण भएको पौडेलले बताउनुभयो । ‘सिङ्गल स्पान’ प्रकृतिका झोलुङ्गे पुल मध्य हालसम्म स्वीजरल्याण्डमा रहेको ४९४ मिटर लामो पुललाई संसारकै लामो पुल भनिएकाले यो पुल संसारकै लामो रहेको पौडेलले बताउनुभयो ।
हालसम्म लामाे मानिएकाे स्विजरल्याण्डकाे पुल सम्बन्धी समाचार
https://www.arch2o.com/longest-bridge-in-the-world-opens-switzerland
