बागलुङ, बैशाख २७ गते । विश्वव्यापी माहामारीको रुपमा फैलिइरहेको कोरोना भाइरस कोभिड १९ को संक्रमण फैलिन नदिनका लागि गरिएको लकडाउँनका अवधीमा उत्तर दक्षिण जोड्ने कालीगण्डकी करिडोरमा निरन्तर काम भइरहेको छ । करिडोरको ट्रयाक निर्माण भई १० मिटर चौडा गर्ने काम गरिरहेको नेपाली सेनाको निर्माण कार्यदलले लकडाउँनका बीच निरन्तर काम गरिरहेको हो ।
अहिले बागलुङको जैमिनी नगरपालिका क्षेत्रमा रहेका अप्ठ्यारा भिरहरुमा विष्फोट गरी सडक चौडा गर्ने काम भइरहेको निर्माण कार्यदलका इन्जिनियर रेश्मीराज भट्टराईले जानकारी दिनुभयो । बागलुङको मालढुङ्गादेखि बलेवासम्मको सडक १० मिटर चौडा गरिसकिएको र अहिले बलेवादेखि बेलवगरसम्मको सडक चौडा गर्ने काम भइरहेको भट्टराईले जानकारी दिनुभयो ।
‘हामीले करिडोरको ट्रयाक खोलीसकेका छौ, अब १० मिटर चौडा गर्ने काम सुरु भएको छ, विष्फोट गर्ने ठाउँमा विष्फोट, कटिङ र जनशक्ति प्रयोग हुने ठाउँमा दुरी कायम गरेर १०० जना भन्दा बढी कामदारहरुलाई काममा खटाइरहेका छौं ।’ भट्टराईले भन्नुभयो ।
