पोखरा, जेठ २६ गते । पोखरा स्वास्थ्य विज्ञान प्रतिष्ठानको आइसुलेसनमा उपचाररत स्याङ्जाका कोरोना संक्रमितको मृत्यु भएको छ । आइतबार कोरोना संक्रमण पुष्टी भएका स्याङ्जाको वालिङ निवासी ६० वर्षीय पुरुषको सोमबार बिहानै मृत्यु भएको हो ।
गण्डकी प्रदेश स्वास्थ्य निर्देशनालयका अनुसार मृत्यु भएका व्यक्ति जेठ २१ गते भारतबाट स्याङ्जाको वालिङ आई २२ गते उपचारका लागि पोखरा आउनुभएको थियो । मृगौला, सुगरलगायतका रोगका विरामी भएका कारण कोरोना संक्रमण हुनुपूर्व तत्कालै पोखरा पठाएर प्रिआइसुलेसनमा राखिएको वालिङ नगरपालिकाका स्वास्थ्य प्रमुख कमल पाण्डेले जानकारी दिनुभयो ।
भारतबाट श्रीमती सहित आएका ति व्यक्तिको स्वास्थ्यमा अन्य समस्या समेत भएकाले पोखरा ल्याएर प्रिआइसुलेसनमा राखिएको र संक्रमण पुष्टी हुँदा साथ आइसुलेसनमा राखेर उपचार गरिएको स्वास्थ्य निर्देशनालयका निर्देशक डा. विनोदविन्दु शर्माले जानकारी दिनुभयो ।
बाहिरबाट आउनेलाई कही कतै सम्पर्कमा आउन नदिई स्थानीय तहहरुले स्थापना गरेको क्वारेन्टाइनमा राख्ने गरिएपनि उहाँलाई वालिङबाट पोखरा ल्याइएकाले त्यो बीचमा सम्पर्कमा आएकाहरुको कन्ट्रयाक टे«सिङको काम सुरु गरिएको निर्देशक शर्माले बताउनुभयो । भारतको राजधानी दिल्लीमा बस्दै आएका ति व्यक्ति श्रीमती सहित विभिन्न सवारी साधनमार्फत नेपाल भारत सिमा सुनौलीसम्म आएको र त्यहाँबाट गाडी रिजर्भ गरेर वालिङ आएको नगरपालिकाले जनाएको छ ।
पोखरा स्वास्थ्य विज्ञान प्रतिष्ठानले मृतक व्यक्तिमा Chronic Kindey Disease, Hypertension, Diabetes, Septicemia, Anaemia लगायत समस्याहरु रहेकै अवस्थामा जेठ २५ गते आइसुलेसन वार्डमा भर्ना गरि उपचार गरिएकोमा राती नै उपचारको क्रममा मृत्यु भएको जनाएको छ ।
