चन्द्र गणेश
बागलुङ जेठ ३२ गते । बागलुङ उद्योग बाणिज्य संघका अध्यक्षलाई पत्रकार महासंघको अध्यक्ष बनाउनुपर्ने माग गर्दै नेपाल प्रेस युनियन बागलुङले पत्रकार महासंघको भवनमा तालाबन्दी गरेका छन् । नेपाल पत्रकार महासंघ बागलुङ शाखाको गत पुस २ गते सम्पन्न साधारणसभाबाट विदा भएका अध्यक्ष नरेश कँडेललाई नै पुनः अध्यक्षको रुपमा मान्नुपर्ने भन्दै नेपाल प्रेस युनियनले तालाबन्दी गरेको जनाएको छ ।
गत निर्वाचनमा सर्वसम्मत अध्यक्षमा चयन भएका नरेश कँडेल बागलुङ उद्योग बाणिज्य संघको अध्यक्षमा निर्वाचित भएको केही समयपछि उपाध्यक्ष नविन शिशिर बिकलाई कार्यवाहक अध्यक्षको जिम्मेवारी दिएका थिए । नेपाल पत्रकार महासंघको साधारणसभामा उद्योग बाणिज्य संघको अध्यक्षका रुपमा आतिथ्यता ग्रहण गरेर महासंघबाट विदा भएका कँडेललाई पुनः अध्यक्ष मान्नुपर्ने युनियनको माग अस्वभाविक भएको प्रेस युनियनमा आवद्ध एक पत्रकारले बताए ।
कार्यवाहक अध्यक्ष नविन शिशिर बिक अध्ययनको सिलसिलामा मुलुक बाहिर गएपछि नेपाल पत्रकार महासंघका केन्द्रीय महासचिव रोशन पुरीले महिला उपाध्यक्ष जिवनकला खत्री ‘सरिता’लाई कार्यवाहक अध्यक्ष जिम्मेवारी प्रदान गरेपछि नेपाल प्रेस युनियन असन्तुष्ट बनेको थियो । असन्तुष्ट युनियनको एक समूहले बिहीबार बिहानै नेपाल पत्रकार महासंघ बागलुङ शाखा भवनको मुख्य गेटमा तालाबन्दी गरेका छन् ।
‘साधारणसभाले नै विदा गरेका व्यक्तिलाई फेरी अध्यक्ष मान्नुपर्छ भन्ने माग नै गलत छ ।’ एक पत्रकारले भने– ‘केन्द्रबाट आएको निर्देशन नमान्ने भए, केन्द्रमा गएर तालाबन्दी गर्नुपर्ने हो, जिल्लासँग कुनै सरोकार नभएको विषय उठाएर राजनीति गरियो ।’ नेपाल पत्रकार महासंघ केन्द्रले जारी गरेको सदस्यता शुद्धिकरण मापदण्डका आधारमा सदस्यता शुद्धिकरण अभियान देशभर चलिरहेको बेला बागलुङमा प्रेस युनियनले बखेडा झिकेको पत्रकारहरु बताउँछन् ।
नेपाल पत्रकार महासंघको केन्द्र तथा प्रदेश समितिमा नेपाल प्रेस युनियनमा आवद्ध भएका पत्रकारहरुको बहुमत छ । आफ्नै संगठनबाट निर्वाचित भएको समितिले सदस्यता शुद्धिकरण गर्ने मापदण्ड तय गरेर सबै जिल्ला शाखाहरुले सदस्यता शुद्धिकरणका लागि दवाव दिने तर स्वयं नेपाल प्रेस युनियनले पत्रकार महासंघको अध्यक्ष छाडेर उद्योग बाणिज्य संघको अध्यक्ष हुन पुगेका व्यक्तिलाइ पुनः अध्यक्षको रुपमा ल्याउनुपर्ने माग गर्नु सदस्यता शुद्धिकरणमा नेपाल प्रेस युनियन तयार छैन भन्ने देखाएको पत्रकार महासंघमा आवद्ध पत्रकारहरु बताउँछन् ।
नेपाल प्रेस युनियन बागलुङका अध्यक्ष प्रदीप पन्तद्धारा हस्ताक्षरित विज्ञप्तीमा नेपाल पत्रकार महासँघ विधान विपरित सञ्चालन भएकाले दवाव दिनका लागि बागलुङ शाखामा तालबन्दी गरिएकाे बताउनुभएकाे छ ।
नेपाल पत्रकार महासँघ बागलुङ शाखाका सचिव विजय रानाले आफु आफन्तको शाेकका कारण बागलुङ बजार बाहिर भएको बेला महासँघमा तालाबन्दी गरिएको जानकारी पाएको बताउँनुभयाे । ‘हामीले पटक पटक पत्रकार महासँघ, अग्रज पत्रकार, पेशागत सँगठनका प्रमुखहरुसँग नियमित रुपमा महासँघलाइ कसरी अगाडि बढाउँने भन्ने विषयमा छलफल गरिरहेका छौ ।’
