सुजन रेग्मी ,बाग्लुङ्ग
स्वतन्त्र विद्यार्थी युनियन (स्ववियू) धौलागिरी बहुमुखी क्याम्पस बागलुङले एक करोड रुपैयाँको ‘धवलागिरी बहुमुखी क्यामपस छात्रवृत्ति कोष’ स्थापना गर्ने भएको छ ।
बुधबार क्यामपसमा स्ववियूले पत्रकार सम्मेलन गरि विभिन्न श्रोत संकलन गर्दै कोष स्थापना गर्ने बताएको हो । क्याम्पसमा अध्ययन गर्न आउने आर्थिक अवस्था कमजोर भएका विद्यार्थीलाई छात्रवृति रकम प्रदान गर्ने उद्धेश्यले कोष स्थापना गर्न लागिएको स्ववियू सभापति सुदिपसागर कँडेलले बताउनुभयो ।
हामीले आर्थिक अवस्था कमजोर भएका विद्यार्थीलाई सहयोग पुर्याउने उद्धेश्यले कोषको स्थापना गर्न लागेका हौँ , कोष खडा गरि कोषमा जम्मा हुने रकमलाई सदरमुकाम स्थित बैङ्कमा मुद्धती निक्षेपमा जम्मा गरि त्यसबाट आउने ब्याजबाट बार्षिक १०० जना विद्यार्थीहरुलाई छात्रवृति प्रदान गरिने उहाले बताउनुभयो ।कोष स्थापनाको लागि स्ववियूको तर्फबाट तिहारमा देउसी खेल्ने, जिल्लाका १० वटा पालिकासँगै व्यवसायी, कर्मचारी, समाजसेवी, भूतपूर्व विद्यार्थी लगायत सबैसँग समन्वय गर्ने बताउनुभयो ।
विभिन्न पालिकासँग समन्वय गर्दा सम्बन्धित पालिकाका विद्यार्थीलाई छात्रवृति उपलब्ध गराउने उद्धेश्य सहित कोष स्थापना गरिने र कोषले क्याम्पसलाई पनि सहज हुने क्याम्पस प्रमुख प्रा.डा रामप्रसाद उपाध्यायले बताउनुभयो ।अहिले पनि हामीले विद्यार्थीहरुलाई छात्रवृति उपलब्ध गराएका छौँ तर त्यसले मात्र नपुग्ने उहाले भन्नुभयो ।
स्थापना गरिने एक करोड रुपैयाँको कोषले आर्थिक अभावकै कारण पढाई छोड्नु पर्ने स्थिती हट्ने छ र उहाले कोष निर्माणको अभियानमा सबैले सहयोग गर्न आग्रह गर्नु भएको छ ।
