बागलुङ / गण्डकी पदेशका मुख्यमन्त्री सुरेन्द्रराज पाण्डेले गाँजा र रक्सीलाई ब्राण्डिङ गरेर प्रदेश सरकारले वैधानिकता दिने बताएका छन् । सहारा युवा क्लबले आयोजना गरेको माघे सक्रमन्ति मेला तथा तेस्रो जैमिनी मेला उद्घाटन गर्दै मुख्यमन्त्री पाण्डेले हिउँदे अधिवेसनमा सरकारले ती बिषयमा कानून बनाउन पहल गर्ने बताए ।
पछिल्लो समय ग्रामीण क्षेत्रको बढ्दो बसाइँसराई, खेतबारी बाँझो र आयातले आर्थिक अवस्था कमजोर भएको भन्दै मुख्यमन्त्री पाण्डेले यी दुई बिषयमा तत्काल वैधानिकताको आवश्यकता देखिएको बताए । ‘गाँजालाई वैधानिकता दिन सकियो भने बाँझो जमिन उपयोग हुन्छ,ु पाण्डेले भने, ‘युवाहरुको आम्दानीको श्रोत समेत बढ्दा विदेश पलायन रोक्न सकिन्छ ।’ उनले उपयोगको मापदण्ड पनि सरकारले बनाउने बताए ।
मुख्यमन्त्री पाण्डेले स्थानीय कोदोबाट बनाइने रक्सीलाई पनि वैधानिकता दिने गरी हिउँदे अधिवेसनमा सरकारले बिधेयक ल्याउने बताए । ‘अहिले लुकेर बनाउने, खुलेर खाने प्रवृत्ति छ,’ उनले भने, ‘कानून बमोजिम उत्पादन र बिक्री गर्ने प्रबन्ध भयो भने खुलेर बनाउने, कर तिर्ने र तोकिएको स्थान र समयमा मात्र खाने व्यवस्थापन हुन्छ ।’
बागलुङ, म्याग्दी लगायतका स्थानमा धेरै पटक गाँजा उत्पादन र ओसारपसार गर्दा दर्जनौं व्यक्ति पक्राउ पर्ने गरेका छन् । अहिले पनि जेलमा अधिकांश अवैध रुपमा गाँजाजन्य पदार्थको कारोवार गरेका, ओसारपसार गरेकाहरु भेटिन्छन् । कानूनले रोक लगाएकोले ती सामाग्री उत्पादन, बिक्री तथा ओसारपसार गर्नेलाई जरिवाना र कैद सजाएको व्यवस्था छ ।
पछिल्लो समय ग्रामीण बस्तीमा बढेको बाँदर आतंक नियन्त्रणमा पनि गाँजाको व्यवसायिक खेती उपयोगी हुने उनको धारणा थियो । ‘बाँदर नियन्त्रणकालागि केही कार्यक्रम बनाएका छौं,ु उनले भने, ‘खेतीपाती खाएर हैरान हुँदा ग्रामीण क्षेत्रबाट बसाई सरेर गाउँ रित्ता भए, अब ती गाउँ भर्नुपर्छ ।’
उनले गाउँमै आयआर्जन गर्ने काम पाएमा युवायुवती बसाई नसर्ने बताए । जैमिनी नगरपालिका ८ को पुरानो गाउँमा बाँदर संरक्षण गर्ने स्थान बनाउन गण्डकी प्रदेश सरकार र नगरपालिकाको संयुक्त कार्यक्रम समेत छ । आगामी आर्थिक बर्षको नीति तथा कार्यक्रम र बजेटमा आर्थिक विकासका धेरै कार्यक्रम जोडेर ल्याउनले उनले बताए ।
‘अब गाउँको आर्थिक बिकासमा जोड दिएर बजेट ल्याउँछौं,ु उनले भने, ‘मुख्य सडकहरु कालोपत्रे गर्ने, गाउँको उत्पादन सहजै बजारमा लैजाने व्यवस्थापन हुन्छ ।’
०४९ अघिसम्म कालीगण्डकी र टिमुरखोलाको संगम जैमिनी घाटमा मेला लाग्ने गरेकोमा ३० बर्षदेखि जैमिनी नगरपालिकाको केन्द्र रहेको कुश्मीसेरामा मेला लाग्दै आएको छ। स्थानीय तह र सहारा युवा क्लबले मेलालाई व्यवस्थापन गर्दै आएका छन् । तीन बर्षदेखि भने व्यवस्थित महोत्सवको रुपमा ७ दिन सम्मको कार्यक्रम गरिदै आइएको छ । माघ ५ गते सम्म चल्ने मेलामा कृषि उत्पादन र घरेलु उद्योगका सामाग्री प्रर्दशनी र बिक्रीकालागि राखिएको छ ।
मेलामा भलिबल प्रतियोगिता र कलाकारहरुको प्रस्तुति समेत राखिएको क्लबका अध्यक्ष सुरेश सुनारले बताए ।
