सुवास आचार्य
असार,२ बागलुङ । यातायान व्यवस्था कार्यालय बागलुङले सवारी नामसारीमा नियतवस दुःख दिने गरेको फेला परेको छ ।
बागलुङ नगरपालिका-५ का शिव राज सार्कीले अटो रिक्सा पास गर्न खोल्दा निमित्त कार्यालय प्रमुख बद्रिनाथ गौतमले ६ दिनसम्म दुःख दिएर काम रोकेको पाइएको छ ।
हंसराज हुलास चन्द एण्ड कम्पनीको नाममा दर्ता भई गत बैशाख २ गते शिव शक्ति अटोमोबाइलका नाममा नामसारी भैसकेको अटो रिक्सा खरीद गर्दा सार्कीले अटो रिक्सा पास गर्न ६ दिन धाउनु परेको हो ।
अटो रिक्सा खरीदको लागि सार्कीले जेठ २३ गते बागलुङ नगरपालिकाबाट सिफारिस लिई २५ गते यातायात कार्यालयमा पेस गरेकोमा २७ गते विल जारी भएपनि नामसारी गर्न निमित्त प्रमुख गौतमले दुःख दिएपछि प्रमुख जिल्ला अधिकारी नेत्र प्रसाद सुवेदीलाई गुहारेका थिए ।
एकै दिनमा हुने कामलाई ६ दिन कुराएपछि प्रमुख जिल्ला अधिकारी सुवेदीको निर्देशनमा बल्ल सार्कीको नाममा अटो रिक्सा शुक्रबार पास भएको छ ।
प्रमुख जिल्ला अधिकारीले काममा भएको ढिलासुस्तीको बारेमा निमित्त कार्यालय प्रमुख गौतमलाई जिल्ला प्रशासन कार्यालय बागलुङमा बोलाएर प्रक्रिया पुरा गराएका सेवाग्राहीको काम सहज ढंगले तत्काल गर्न आवश्यक निर्देशन दिएपछि शुक्रवार काम बनेको थियो ।
यातायात कार्यालयमा सेवाग्राही र अटोमोबाइल व्यवसायीहरुले भोग्नु परेको हैरानी, काममा ढिलाइ तथा अनावश्यक जरिवाना तिराउने गरेको बारेमा समेत प्रजिअ सुवेदीले गौतमसँग सोधेका थिए ।
कार्यालयमा सेवा लिन आउने अटोमोबाइल व्यवसायी र सेवाग्राहीहरुलाई यातायात व्यवस्था कार्यालयका प्रमुख तथा निमित्त प्रमुख र केही प्राविधिक फाँटका प्राविधिकले काममा ढिलाइ गर्ने, ठूलो रकमको जरीवाना तिराउने, नियतबस दुःख दिने र घुमाउरो पारामा पैसासमेत मागेर दुःख दिने गरेका छन् ।
साथै ५ बजेसम्म खुल्ने कार्यालयमा राजश्व तिर्ने समय २ बजे नै बन्द हुँदा टाढा टाढाबाट आउने सेवाग्राही मर्कामा परेको छन् ।
एउटै काममा पटकपटक धाइरहनु , सर्वसाधारणले प्रक्रियागत रूपमा काम गर्न सक्ने अवस्था यातायात व्यवस्था कार्यालयमा छैन अनि कर्मचारीका असभ्य व्यवहारका कारण पनि सेवाग्राहीहरु र अटोमोबाइल व्यवसायीहरु मानसिक रुपमा पीडित छन् ।
बागलुङलगाएत पर्वत, म्याग्दी र मुस्ताङका सेवाग्राहीलाई समेत सेवा दिनु पर्ने कार्यालयमा सेवाग्राहीको भीड देखिए पनि कर्मचारीले समयमै काम नसक्दा सेवाग्राहीहरु पटकपटक कार्यालय धाउनु पर्ने बाध्यता रहेको छ ।
कार्यालय प्रमुख उप सचिव गुमा देवी शर्मा विदामा रहेकाले सूचना अधिकारी बद्रीनाथ गौतमले निमित्त प्रमुखको जिम्मेवारी समालेका छन् ।
