बागलुङ ३ असार । राष्ट्रिय स्वतन्त्र पार्टी बागलुङले बिभिन्न साताव्यापी कार्यक्रमका साथ पार्टीको दोस्रो स्थापना दिवस मनाउने भएको छ ।
राष्ट्रिय स्वतन्त्र पार्टीको केन्द्रिय निर्णय अनुरुप जिल्लामा बिभिन्न कार्यक्रम गरि दोस्रो स्थापना दिवस मनाउन लागेको हो । साताव्यापी कार्यक्रम अन्तरगत पहिलो दिन आइतवार कार्यक्रमका बारेमा पत्रकारहरुलाई जानकारी गराएको छ ।
दोस्रो दिन असार ३ गते हालसालै निर्माण सम्पन्न र निर्माणाधीन भौतिक पूर्वाधारका योजनाहरुको अनुगमन गर्ने भएको छ । विशेषतः बागलुङ नगरपालिका–१ स्थित बाङ्गेचौर खेल मैदानमा निर्माण हुन नसकेको प्याराफिटको अनुगमन गरि निर्माणका लागि दबाव दिइने जिल्ला उपसंयोजक टेकबहादुर कुवँर रमेशले जानकारी दिए ।
यसैगरि असार ४ गते धौलागिरि अस्पतालमा सरसफाई र बजार क्षेत्रमा कुहिने र नकुहिने फोहोर व्यवस्थापनका लागि बागलुङ नगरपालिकालाई ६० वटा डस्विन बितरण गर्ने, ५ गते शालिग्राम संग्रालय परिषरमा बृक्षारोपण गर्ने र ७ गते पार्टी स्थापनाको दिन चियापान कार्यक्रम गरिने ¥यापिट टिम संयोजक रुसन सापकोटाले जानकारी दिए ।
‘जान्नेलाई छान्ने’ भन्ने नाराका साथ जिल्लामा पार्टी स्थापनाको दोस्रो बर्षमा आइपुग्दा १० पालिका मध्ये ताराखोला, तमानखोला, निसीखोला र काँठेखोला बाहेक अन्य पालिकामा संगठन बिस्तार भएको र पालिकाका अन्य वडामा पनि संगठन बिस्तार गरिएको प्रदेश उपसभापति मिना शर्मा आचार्यले जानकारी दिइन ।
