बागलुङ । पाैष २८ बागलुङ एकता क्लबको आयोजनामा सोमबारबाट हुने दोस्रो स्मृति कप फुटबल प्रतियोगिताको ट्रफी सार्वजनिक गरिएको छ ।
आईतबार जिल्ला खेलकुद विकास समितिका अध्यक्ष कुमार खड्का, जिल्ला फुटबल संघ बागलुङका अध्यक्ष जय राजभण्डारी, नेपाल पत्रकार महासंघ बागलुङ शाखाका अध्यक्ष राम थापा र क्लबका अध्यक्ष इन्सान थापाले संयुक्त रुपमा ट्रफी सार्वजनिक गर्नुभएको थियो ।
सोमबारदेखि संचालन हुने प्रतियोगितामा १४ टिमले सहभागिता जनाउने क्लबका अध्यक्ष थापाले बताउनुभयो । बाङ्गेचौर खेलमैदानमा हुने प्रतियोगिताका नकआउट चरणमा खेलाइने बताइएको छ ।
प्रतियोगिताको विजेता र उपविजेताले क्रमशः १ लाख २२ हजार २ सय २२ रुपैयाँ र ६६ हजार ६ सय ६६ रुपैयाँ, ट्रफी, मेडल र प्रमाणपत्र प्राप्त गर्ने क्लबले जनाएको छ । यस्तै उत्कृष्ट खेलाडीहरुलाई विधागत पुरस्कार प्राप्त गर्नेछन् । ८ लाख रुपैयाँ खर्च लाग्ने अनुमान गरेको आयोजकले सहयोगी संस्था र व्यक्ति मार्फत ६ लाख रुपैयाँ सहयोग संकलन भइसकेको जनाएको छ ।
ट्रफी सार्वजनिक कार्यक्रममा बोल्दै नेपाल पत्रकार महासंघ बागलुङ शाखाका अध्यक्ष राम थापाले खेलकुदले खेलाडीलाई प्रतिस्पर्धा र अनुशासन सिकाउने बताउनुभयो । उहाँले खेल आयोजना गर्नु चुनौती रहेको बताउँदै क्लबले आफ्ना पूर्व सदस्यहरुको सम्झनामा प्रतियोगिता गरेर युवाहरुलाई खेलमा लाग्न सन्देश दिएको बताउनुभयो । क्लबका अध्यक्ष इन्सान थापाको अध्यक्षतामा सम्पन्न भएको ट्रफी सार्वजनिक कार्यक्रमको संचालन पत्रकार रोहन जि.सी.ले गर्नुभएको थियो ।
सोमबार उद्घाटन खेलसहित दुई खेल हुने क्लबले जनाएको छ । उद्घाटन खेल आयोजक बागलुङ एकता क्लब र श्री मेयर गण विच हुनेछ भने दोस्रो खेल नारायण दल गण र खेलकुद विकास समिति बा.न.पा.–६ को विच हुनेछ ।
